Elordalyq ustazdar men ata-analar «Biz birgemiz» aktsııasyna qatysty

NUR-SULTAN. QazAqparat - Sońǵy birneshe kún qardyń qalyń túsýi saldarynan elorda kóshelerindegi qozǵalys qıyndap, mektepterde oqý toqtatyldy. Alaıda, aýa-raıynyń qolaısyzdyǵyna qaramastan qala turǵyndary birigip, qalany qardan tazalaýǵa atsalysyp jatyr, dep habarlaıdy qala ákimdiginiń resmı saıty.

«Biz birgemiz» aktsııasyn Nur-Sultan qalasyndaǵy bilim berý uıymdarynyń ustazdary, oqýshylar men ata-analar qoldap, mektep aýlasyn qardan tazalaý sharasyn ótkizdi. Atap aıtqanda, #Bizbirgemiz halyqtyq chellendjine elordalyq mektepterdiń, mektepke deıingi uıymdardyń, kolledjderdiń pedagogtary, Oqýshylar saraıynyń ujymy belsendi qoldady jáne olarǵa janashyr ata-analar men stýdentter qosyldy. Barlyq bilim berý mekemeleriniń aýmaǵyn qardan tazartyp, eriktiler áleýmettik jelilerde foto men vıdeo júktep #Bizbirgemiz heshtegimen jarııalaýda.