Elordalyq úleskerlerdiń 2 mlrd teńgesin úptep ketken áıel Sankt-Peterborda ustaldy
Elordalyq polıtsııa departamentiniń málimetinshe, kúdiktige 2019 jyldyń qazanynda senip tapsyrylǵan múlikti ıemdený jáne talan-tarajǵa salý aıyby taǵylǵan. Qazirgi kezde ol Reseıdiń Sankt-Peterbor qalasyndaǵy ýaqytsha oshaýlaǵyshqa qamaldy.
«Kúdiktini Qazaqstan Respýblıkasyna ekstradıtsııalaý máselesi sheshilýde. Ol polıtsııadan jasyryný úshin Reseıdiń ártúrli aımaǵynda turǵylyqty jerin únemi aýystyryp otyrǵan. Bet-álpetin ózgertip, jaldamaly páterlerde turǵan. Óziniń týystarymen senimdi adamdar arqyly baılanysqan», - dedi vedomstvodan.
Polıtsııa aqparatyna sáıkes, kúdikti Nur-Sultan qalasynda «Talısman» kóppáterli úıdiń qurylysy úshin «Jeńis Astana Premıým» turǵyn úı qurylys kooperatıvin tirkegen. Osy maqsatta ol ınvestorlardy tarta bastaǵan. Turǵyn úı kooperatıvi quramyna jańa múshelerdi tartý jáne jarnalardy alý arqyly adamdardan qomaqty somany jınap alyp, ózi ıemdengen. Úleskerlerden jınalǵan aqshanyń ortasha somasy 2 mıllıard teńgeni quraıdy.