Elordalyq túngi klýb ıeleri men Esirtki bıznesimen kúres basqarmasy memorandýmǵa qol qoıady
ASTANA. 22 qarasha. QazAqparat - Esirtki jáne esirtki bıznesimen kúres baǵdarlamasy Astana qalasy aýmaǵynda 2012 jyldyń sáýirinde qabyldandy.
Baǵdarlamada sheshimin kútken eń basty túıtkildiń biri - qalanyń oqý oryndary men oıyn-saýyq mekemelerinde esirtkiniń taralýy bolyp tabylady. Keshe Astana qalasynyń esirtki bıznesimen kúres basqarmasy ókilderi men qalanyń túngi oıyn-saýyq mekemeleri ákimshiliginiń jumys kezdesýi ótti, dep habarlady Astana qalasynyń resmı saıty.
«Qalanyń oıyn-saýyq mekemesi aýmaǵynda esirtkilerdi satý faktisi tirkeldi. Atap aıtqanda, meıramhanalardyń biri kelýshiler kalıan arqyly shekken gashısh satty. Sondaı-aq, túngi klýbtardyń biriniń barmeni jeliktiretin tabletkalardy satý kezinde ustaldy, - dep málimdedi kezdesý kezinde Basqarma bastyǵy Vadım Altynbekov.
Osy túıtkilder men qıyndyqtardy sheshý maqsatynda ol túngi klýbtar men meıramhanalar jáne basqa da oıyn-saýyq mekemeleri basshylaryna mekemelerine keletin esirtkiniń jolyn kesý úshin ózara tıimdi yntymaqtastyq týraly memorandýmǵa qol qoıýdy usyndy. «Biz óz tarapymyzdan esirtki qoldanǵandardy kirerde anyqtaıtyn kúzet qoıýǵa kómektesemiz. Sondaı-aq, oıyn-saýyq mekemelerinde esirtkiniń zııandylyǵy týraly slaıdtar kórsetip, úlestirý materıaldaryn taratyp, aldyn alý is-sharalaryn ótkize alar edik», - dedi Vadım Altynbekov.
Óz kezeginde túngi klýb ókilderiniń biri Natalıa óz mekemesinde júrgizilgen esirtki taratýǵa qarsy keıbir is-sharalar týraly áńgimeleı kelip: «Biz narkologııamen kelisimge otyrdyq. Dárigerler turaqty túrde kelip barlyq qyzmetkerlerimizdi esirtki zattaryn qoldaný máselesinde testiden ótkizedi»,-dedi.
Alaıda, qıyndyqtar da bar. Túngi klýbqa ákelinetin esirtki zattaryn túgel baqylaý múmkin bolmaı otyr.
«Tekserý kezinde kelýshilerden tabylǵan kez kelgen preparattar - meıli ol analgın bolsyn, meıli ol valerıanka bolsyn klýbqa jiberilmeıdi. Degenmen, bizdiń kelýshilerdiń qol sómkesiniń ishin ashyp qaraýǵa, ish kıimderin tekserýge quqymyz joq. Sondyqtan men esirtkimen kúres basqarmasy qyzmetkerlerine túngi klýbtyń kartasyn tolyq ashyp kórsetýge ázirmin. Olar ózderi kelýshilerdi jan-jaqty teksersin», - deıdi túngi klýb ókili.
