Elordalyq túlekter meshitke kelip, úlkenderdiń batasyn aldy
Birer kúnnen soń mektep qabyrǵasynan túlep ushyp, úlken ómirge qadam basatyn jas jetkinshekterdiń jigerin janyp, rýhanı qoldaý kórsetýge baǵyttalǵan bul sharaǵa elorda mektepterinen 2000-nan astam oqýshy jınaldy.
Qazaqstan musylmandary dinı basqarmasynyń Nur-Sultan qalalyq ókildigi uıymdastyrǵan shara barysynda shákirtter QMDB tóraǵasynyń birinshi orynbasary, naıb-múftı Naýryzbaı qajy Taǵanuly, memleket jáne qoǵam qaıratkeri Myrzataı Joldasbekov, Nur-Sultan qalasy qoǵamdyq damý isteri basqarmasynyń basshysy Danııar Esın, belgili aqyn, «Shalqar» radıosynyń dırektory Qalqaman Sarın bastaǵan bastaǵan el aǵalarymen júzdesip, áńgimesine qanyqty. El aǵalary jas túlekterge ómirlik tájirıbesinen ósıet aıtyp, aqyl-keńesimen bólisti. Úlken ómirdiń alǵashqy synaǵynan súrinbeı ótip, bilim kóginde erkin samǵaýyna tilektestik bildirip, bata berdi.
Shara aıasynda túlekterge rýhanı qoldaý kórsetý, sátsizdikter men qatelikterge kúırep túspeı, sabyrlyqqa úıretý maqsatynda arnaıy búktemeler taratyldy.
