Elordalyq túlekter QR Tuńǵysh Prezıdentiniń murajaıynda Qazaq ekonomıka ýnıversıtetiniń rektoratymen kezdesti
ASTANA. 21 sáýir. QazAqparat /Kenjekeı Toqtamurat/ - Búgin Qazaqstan Respýblıkasy Tuńǵysh Prezıdentiniń murajaıynda elordalyq mektep qýshylary Qazaq ekonomıka, qarjy jáne saýda ýnıversıtetiniń rektoratymen kezdesý ótkizdi.
Júzdesýge Astana qalasyndaǵy mektepterdi bitirgeli otyrǵan túlekter, atap aıtqanda bolashaǵyn ekonomıka, kedendik is, týrızm jáne áleýmettik jumystar salasymen baılanystyratyn mektep oqýshylary keldi.
«Búgingi kezdesý ımıdjdik maqsatty kózdeýge arnalyp otyr. Qazaq ekonomıka, qarjy jáne saýda ýnıversıteti elimizdegi aldyńǵy qatarly ekonomıkalyq bilim berý oryndarynyń biri bolyp tabylady. Oqý ornynyń 11 jyldyq tarıhı bar, buryn ol T.Rysqulov atyndaǵy Qazaq ekonomıkalyq ýnıversıtetiniń fılıaly bolǵan. Qazir jeke ýnıversıtet», - deıdi atalmysh oqý ornynyń oqý isi jónindegi prorektory, ekonomıka ǵylymdarynyń doktory, Halyqaralyq aqparattandyrý akademııasy men Eýrazııa halyqaralyq ekonomıka akademııasynyń akademıgi Nurıla Kúshikova.
Onyń aıtýynsha, ýnıversıtet 15 baǵyt, jalpy alǵanda ekonomıkalyq mamandyqtar boıynsha bilim beredi. «Biz jylyna 4 500 maman daıyndap shyǵaramyz jáne búgingi kezdesý talapkerler úshin óte mańyzdy dep oılaımyn. Osyndaı jıyndar mektep túlekteri úshin de, oqý oryndarynyń ujymdary úshin de óte tıimdi», - dep atap ótti ol.
Kezdesýde mektep túlekteri úshin arnaıy baǵdarlama ázirlenip, ol baǵdarlamanyń kómegimen oqý ornynyń rektorat músheleri, fakýltet dekandary, kafedra meńgerýshileri bolashaq talapkerlerdi qyzyqtyrǵan san-salaly suraqtarǵa jaýap berdi.
Qazaq ekonomıka, qarjy jáne saýda ýnıversıteti elimizdegi JOO-lar arasynda ǵana tanymal emes, álemdik bilim berý keńistiginde de básekege qabiletti ekenin aıta ketý kerek. Ýnıversıtet halyqaralyq áriptestikti qatar damytyp, halyqaralyq bilim berý jobalaryna, ártúrli baıqaýlar men semınarlarǵa únemi qatysyp otyrady.
