Elordalyq teatr «Teatr kóktemi-2011» respýblıkalyq festıvalinen jeńispen oraldy
ASTANA. 29 naýryz. QazAqparat /Gúlmıra Álıakparova/ - Astanadaǵy Q.Qýanyshbaev atyndaǵy Qazaq mýzykalyq drama teatrynyń ártisteri «Teatr kóktemi-2011» respýblıkalyq festıvalinde qoıǵan E.Jýasbektiń «Sen úshin» komedııasy festıvaldiń «Eń úzdik qoıylymy» atandy.
Teatrdyń baspasóz qyzmetinen habarlaǵandaı, Shymkent qalasynda ótken «Teatr kóktemi-2011» respýblıkalyq festıvalin QR Táýelsizdiginiń 20 jyldyǵy men 27 naýryz - Halyqaralyq teatr kúni merekesine oraı Ońtústik Qazaqstan oblysy ákimdigi men oblystyq mádenıet basqarmasy uıymdastyrdy.
Rejısser Nurlan Jumanııazovtyń jetekshiligimen qoıylǵan «Sen úshin» komedııasy festıvaldiń birden úsh atalymynda úzdik tanyldy. Birinshiden, spektakl «Eń úzdik qoıylym» atandy. Ekinshiden, QR eńbek sińirgen qaıratkeri, «Qurmet» ordeniniń ıegeri Láılá Beknazar-Hanınga «Eń úzdik áıel róli» atalymy boıynsha marapattaldy. Al arnaıy taǵaıyndalǵan úshinshi júldeni spektakldiń qoıýshy rejısseri Nurlan Jumanııazov ıelendi. Aıta keteıik, rólderdi kórermenderdiń kózaıymyna aınalǵan ártister Qýandyq Qystyqbaev pen Shah-Murat Ordabaevtar somdaıdy.
«Sen úshin» qoıylymynyń tusaýkeseri 2010 jyldyń 9 sáýirinde ótti. Onyń premerasy Láılá Beknazar-Hanınganyń «Benefısine» arnaldy. Komedııanyń taqyryby qarapaıym adamdardyń ózara qarym-qatynasy týraly. Osy kúngi keıbir jandar bir-birine degen senimin saýdaǵa salyp, syılastyǵyna syzat túsirip te alady. Al keıbir baqaı eseptiń ıeleri osynaý qubylysty paıdalanyp, jalǵan syılasady. Avtor osy oqıǵany qoıylym barysynda qısyndy sıýjetke ulastyrady.
