Elordalyq teatr qazaqstandyqtardy 97 metr bıiktikten quttyqtady

NUR-SULTAN. QazAqparat - M.Gorkıı atyndaǵy Memlekettik akademııalyq orys drama teatry Táýelsizdik kúnin merekeleý aıasynda elordamyzdyń basty nyshany – «Báıterek» monýmenti kesheninde ádebı-mýzykalyq qoıylymdy usyndy, dep habarlaıdy QazAqparat.

Akterlar Nur-Sultan qalasynyń turǵyndary men qonaqtaryn kele jatqan Táýelsizdik kúnimen 97 metr bıiktikten quttyqtady. Qoıylym baǵdarlamasyna elimizde mereıtoılary atalyp jatqan qazaqtyń uly tulǵalary Abaı, Sáken Seıfýllın, Іlııas Jansúgirov, Beıimbet Maılınniń shyǵarmalary endi.

Kompozıtsııa rejısserlary QR eńbek sińirgen ártisi Bekpýlat Parmanov jáne QR «Mádenıet qaıratkeri» Lıýdmıla Krıýchkova atap ótkendeı, teatr repertýaryna jańadan qosylǵan qoıylym stsenarııi mereke qarsańynda qaıta qaralyp, jas akterlardyń oryndaýyndaǵy patrıottyq ándermen tolyqty.

«Daıyndalǵan shyǵarmany «Báıterek» keshenine kelgen barlyq meımandar tegin tamashalaı aldy. Kórermender qatarynda elordaǵa mereke qarsańynda kelgen Almaty, Shymkent, Qostanaı jáne Qaraǵandy qalalarynyń turǵyndary. Sondaı-aq, kompozıtsııa Polsha men Belgııadan kelgen týrıster úshin qazaq ádebıetiniń ekskýrsy retinde óz paıdasyn tıgizdi. Sheteldik meımandar ártisterdiń ónerine tánti bolyp, avtorlardyń shyǵarmalaryna qyzyǵýshylyq bildirdi», - dedi teatrdyń baspasóz qyzmetinen.