Elordalyq tártip saqshylary kireberiste temeki tartqanǵa aıyppul salady
ASTANA. QazAqparat - Qoǵamdyq tártip erejelerin buzýdy anyqtaý maqsatynda elordalyq ІІD Jergilikti polıtsııa qyzmetiniń ýchaskelik ınspektorlary kúndelikti negizde ákimshilik ýchaskelerinde profılaktıkalyq reıdter men tekserýler ótkizedi.
Osyndaı shara barysynda turǵyn úılerdiń kireberisterinde turǵyndardyń temeki tartýymen baılanysty birqatar buzýshylyqtar anyqtaldy, dep habarlaıdy astana.kz.
Atap aıtqanda, Dosmuhameduly kóshesinde ornalasqan kóppáterli turǵyn úıdiń 44 jastaǵy turǵynyna aıyppul salyndy. Polıtsııa qyzmetkerleri jekelegen qoǵamdyq oryndarda temeki tartýǵa salynǵan tyıymdy buzǵany úshin er adamdy QR ÁQBK 441 baby boıynsha ákimshilik jaýapkershilikke tartty. Osylaısha, zań buzýshy 3 AEK (6807 teńge) kóleminde aıyppul tóleıtin bolady. Jyl ishinde atalǵan bapty qaıtalap buzǵan jaǵdaıda 6 AEK mólsherinde aıyppul qarastyrylǵan.
Jyl basynan beri Astana q. ІІD JPQ qyzmetkerleri ruqsat etilmegen oryndarda temeki tartqany úshin 100-ge jýyq, 2016 jyly 17 220 quqyq buzýshyny anyqtady.
Eske salsaq, «Halyq densaýlyǵy jáne densaýlyq saqtaý júıesi týraly» kodekstiń 159 babynyń 5 tarmaǵyna sáıkes, mádenı-buqaralyq nysandardyń aýmaǵynda jáne belgilenbegen oryndarda temeki tartýǵa tyıym salynǵan: turǵyn úılerdiń kireberisterinde, jolaýshylardy tasymaldaý barysynda avtobýstardyń, taksı kólikteriniń salondarynda jáne t.b.
Quqyq buzýshylyq anyqtalǵan jaǵdaıda jaqyn mańdaǵy ýchaskelik beketke nemese 102 nomerine habarlasý qajet.
