Elordalyq taksı kompanııalaryna 10 mln teńgeden astam aıyppul salyndy
NUR-SULTAN. QazAqparat - Nur-Sultan qalasynyń taksı tasymaldaýshylary básekege qarsy kelisimi úshin ákimshilik jaýapkershilikke tartyldy, dep habarlaıdy QazAqparat QR Ulttyq ekonomıka mınıstrligi básekelestikti qorǵaý jáne damytý komıtetine silteme jasap.
«Nur-Sultan qalasynyń mamandandyrylǵan aýdanaralyq ákimshilik sotynyń 2019 jylǵy jeltoqsandaǵy qaýlysymen taksı tasymaldaýshylary QR Ákimshilik quqyq buzý týraly kodeksiniń 159-baby 1-bóliminde kózdelgen quqyq buzýshylyqty jasaǵany úshin ákimshilik jaýapkershilikke tartyldy. Aıyptylarǵa jalpy somasy 10 735 498 teńge bolatyn aıyppul salyndy. Sondaı-aq, 13 033 375 teńge kóleminde monopolııalyq tabysy tárkilenip, ákimshilik jazaǵa tartyldy» delingen habarlamada.
Komıtet taratqan aqparatqa súıensek, buǵan deıin «Taxi Zhebe» JShS, «Vector Ast, Partners» JShS, «Arna-Medıa» JShS, «Astana Taxi Drivers» JShS, «Arýna Trans» JShS, «Compass Energy» JShS, «QR «Kengýrý» Jolaýshy tasymaldaý» JShS, «Taxi ALTYN» JShS, «SB Group Astana» JShS, «King Way» JShS qatysty baǵany belgileý nemese ustap turý boıynsha básekelestikke qarsy kelisim belgilerin anyqtaý úshin tergep-tekserý júrgizilgen.
