Elordalyq sýda qutqarý qyzmetteri 7 aıda 22 adamdy qutqardy
ASTANA. 11 tamyz. QazAqparat - Sýda qutqarý qyzmetteri 2013 jyldyń 7 aıynda Astanada 22 adamdy, sonyń ishinde 3 balany qutqardy. Bul týraly astana.kz saıtyna Astana qalasynyń Tótenshe jaǵdaılar departamentinen habarlady.
Bıyl qańtar-shilde aılarynda elordanyń sý qoımalarynda 29 adam zardap shekti, jeteýi kóz jumdy. Al ótken jyly atalǵan kezeńde elordalyq sý qoımalarda 33 adam zardap shegip, 23-i, sonyń ishinde 2 bala qutqarylyp, 8 adam qaıtys bolǵan. Vedomstvonyń habarlaýynsha, sýda oryn alatyn tótenshe jaǵdaılarǵa kóbine mas kúıde shomylý sebep bolady. Oqıǵalardyń 98% astamy jabdyqtalmaǵan jáne tyıym salynǵan jerlerde shomylý, belgisiz jerlerde súńgý kezinde oryn alǵan. Súńgýirler úshin sýǵa ketken balalardy sý túbinen shyǵarý óte qıyn. Statıstıkalyq málimetterge sáıkes, Astanada jyl saıyn osyndaı 1-3 oqıǵa tirkeledi. Balalar men jasóspirimderdiń qazasyna óz erkimen ózenge barý jáne úlkenderdiń tarapynan baqylaýdyń bolmaýy jıi sebep bolady. Belgisiz jerlerde sekirý de asa qaýipti bolyp tabylady. Mysaly, kópirler salǵan kezde tirekterdiń negizin sý shaıyp ketpes úshin qurylys materıaldarynyń qaldyqtaryn ádeıi qaldyrady. Tótenshe jaǵdaılar mınıstrliginiń habarlaýynsha, 2013 jyldyń qańtar-shilde aılarynda elimizdiń sý qoımalarynda 1078 adam zardap shekti, sonyń ishinde 259 bala, bul 2012 jyldyń sáıkes merzimimen salystyrǵanda 28% (1502 adam) az. Bıyl QR TJM sýda qutqarý qyzmetteriniń mamandary 777 adamnyń (sonyń ishinde 209 balanyń) ómirine arasha boldy. Vedomstvonyń baspasóz qyzmetiniń málimetteri boıynsha, 301 adam (sonyń ishinde 50 bala) sýǵa ketken, bul 2012 jyldyń 7 aıymen salystyrǵanda 25% (401 adam) tómen.
