Elordalyq stýdentter qoǵamdyq tártipti qorǵaýmen aınalysady
ASTANA. QazAqparat - Jaz aıynda Astanada 200-den astam stýdent polıtseı qyzmetin atqarady, dep habarlaıdy QazAqparat elorda ákimdiginiń saıtyna silteme jasap.
Astananyń qoǵamdy damytý isi boıynsha basqarmasy Іshki ister departamentimen birge stýdenttik «Saqshy» quqyq tártibi jasaǵynyń jobasyn qolǵa aldy.
Astanadaǵy JOO men kolledjderdiń 210 stýdenti osy jazda qoǵamdyq tártipti qorǵaýmen aınalysady. Búgin olarǵa arnaıy forma, kýálik berildi jáne arnaıy nusqaýlyq boıynsha daıyndaldy.
«Osy jyly biz atalǵan jasaqtyń formatyn azdap ózgerttik. Stýdentter men eriktiler tártipti qorǵaýǵa ǵana emes, birinshi kezekte túrli quqyq buzýshylyqtyń aldyn alýǵa, qaýipsizdik mádenıetin qalyptastyrýǵa da qatysady. Olardyń mindeti - túsindirý, qylmys pen qaıǵyly oqıǵaǵa jol bermeý. Máselen, qazir balalar jaraqaty óte kóp, terezeden qulap ketip jatqan sábıler bar. Bul týraly jastar jasóspirimderge aıtyp, mádenıetimizdiń qaýipsizdigin qalyptastyrady. Sondaı-aq, stýdentterdi shomylý maýsymy kezinde de tartamyz, olar sýdaǵy qaýipsizdik tehnıkasyn balalarǵa túsindiretin bolady», - dedi qoǵamdyq damytý basqarmasynyń basshysy Danııar Esın.
Olardyń arasynda tártip saqshysy bolýdyń qandaı ekenin bilgisi keletinder de bar. Ajar Amangeldi jasaqqa kelmes buryn arnaıy nusqaýlyqtan ótti. Qalany kúzetetin árbir topta birneshe erikti men polıtseı bolady.
«Nege erikti bolýǵa keldim? Óıtkeni, ata-anam organda jumys isteıdi, maǵan osy jumystyń qandaı ekenin ishteı kórýge, solardyń izinen erýge bola ma, joq pa, anyqtaýǵa múmkindik týyp tur. Sol sebepti, usynǵan bette qýana kelistim», - deıdi Ajar Amangeldi.
Aıta keteıik, qazirgi tańda qala boıynsha 900 volonter men polıtseıdiń erikti kómekshisi bar. Astananyń 20 jyldyǵyn toılaý qarsańynda jańa kúsh artyqtyq etpeıdi.
«Elordanyń 20 jyldyǵy qarsańynda bizdiń polıtseılerge salmaq túser kezde bul árıne aıtarlyqtaı kómek. Eń birinshi kezekte jastar ortasynda quqyq buzýshylyqtyń aldyn alýdy uıymdastyrýǵa, quqyq buzýdyń jolyn kesý jáne eskertý máselesi boıynsha ishki ister organdarymen ózara birlesip jumys isteýdi kózdep otyrmyz», - deıdi qalalyq ІІD Jergilikti polıtsııa qyzmetiniń basshysy Baqytjan Malybaev.
Atalmysh shara «Bolashaqqa baǵdar: rýhanı jańǵyrý» baǵdarlamasyn júzege asyrý jáne nasıhattaý sheńberinde ótip jatyr. Aktsııa jazdyń sońyna deıin jalǵasady.
