Elordalyq sportshy Qazaqstan tarıhynda alǵash ret ústel tennısinen ITTF World Tour jeńimpazy atandy
ASTANA. QazAqparat - Kırıll Gerasımenko Qazaqstan tarıhynda alǵash ret ITTF World Tour fınalyna qatysyp, chempıon atandy, dep habarlaıdy Astana qalasynyń dene shynyqtyrý jáne sport basqarmasy.
Býdapesht qalasynda ústel tennısinen osy maýsymdaǵy birinshi álemdik týr aıaqtaldy. 21 jasqa deıingi topta Astana qalasy ákimdiginiń Mamandandyrylǵan joǵary sporttyq sheberlik mektebiniń ókiili Kırıll Gerasımenko aqtyq synda 3:2 esebimen frantsýz Akkýzý Kannan basym tústi.
«Álemniń myqtylarynan aılamdy asyryp, chempıon atanǵanyma qýanyshtymyn. Sońǵy oıyndarda kúres qıynǵa soqty. Biraq osyndaı múmkindikti jibermeýge tyrystym, qıyn sátterde ata-anam, aǵalarym týraly oıladym, olar da men sııaqty sporshylar», - deıdi Kırıll Gerasımenko.
