Elordalyq sheneýnikterdiń jalaqysy 500 myń teńgege deıin ósti
ASTANA. QazAqparat - Elorda basshysy Áset Isekeshev qalalyq ákimdikte eńbek etetin qyzmetshilerdiń qansha aılyq alatynyn aıtyp berdi, dep habarlaıdy QazAqparat tilshisi.
«Ótken jyly elordadaǵy basqarma basshylarynyń aılyǵy 170 myń teńge shamasynda boldy. Bul rette olar basqaryp otyrǵan basqarmalardyń bıýdjeti 70 mlrd teńgeden asatynyn aıta ketý kerek. Tıimdi, kásibı ári ashyq basqarýdy qamtamasyz etý úshin, árıne, aılyqty ósirip, kásibı kadrlardy tartý kerek boldy. Basqarma basshylary men orynbasarlarynyń laýazymdyq aılyǵynyń mólsheri eki esege - 500 myń teńgege deıin, al bólim basshylarynyń aılyǵy 2,5 esege - 350 myń teńgege, bas mamandardyń aılyǵy 2 esege - 290 myń teńgege deıin ósirildi. Demek, biz basshylardyń, negizinen tómengi jáne orta býynnyń aılyǵyn ósirdik», - dedi ákim «iKomek» qalalyq monıtorıng jáne jedel áreket etý ortalyǵynyń otyrysynda.
Onyń aıtýynsha, Astana ákimdigindegi memlekettik qyzmetshilerdiń aılyq eńbekaqysy olarǵa degen talaptardyń jedel artýyna baılanysty pılotty joba aıasynda ósirilgen. Áset Isekeshev sonymen birge, osy jyldyń basynan bastap qalalyq ákimdiktegi 104 vakantty orynǵa 700 ótinim kelip túskenin, ár laýazymǵa 7 úmitkerden kelgenin atap ótti.
«Aılyqtyń jaıdan-jaı ósirilmeıtinin, negizgi tıimdilik kórsetkishi boıynsha arttyrylatynyn aıta ketý kerek. Osynyń arqasynda jyl basynan beri memlekettik qyzmetke «Bolashaq» baǵdarlamasynyń 13 túlegin, kvazımemlekettik sektordyń 7 top-menedjerin tartýǵa múmkindik týdy. Kadrlar aýysymynyń mólsheri 3 paıyzdan 0,4 paıyzǵa deıin azaıdy», - deıdi qala basshysy.
Onyń aıtýynsha, ákimdikti transformatsııalaý qosymsha shtattardy tartpaı-aq jańa baǵyttarda kadrlyq quramdy kúsheıtýge jol ashqan.
«Ózderińiz biletindeı, bul gazdandyrý. Kelesi jyly biz qaladaǵy JEO-ny, birneshe turǵyn úılerdi - Kóktal, Ońtústik-Shyǵys, sodan keıin shahardyń ózge de aýdandaryn gazdandyramyz. Elektrenergııa jáne energııa únemdeý, qala qurylysyndaǵy ýrbanıstıkalyq ádis, tsıfrlandyrý amaldary men kıberqaýipsizdik saıasaty men ózge de kóptegen ádister arqyly ishki rezervti tartyp, ony kúsheıtýge múmkindik aldyq», - deıdi ákim.
Aıta ketsek, budan buryn qala basshysy Astanaǵa halyqtyń kóptep kóship kelýinen memlekettik qyzmetshilerdiń jumysy aýyrlaı túskenin aıtqan edi. Onyń ústine Áset Isekeshevtiń aıtýynsha, ótken jyly 9 qurylymdyq bólimshe qysqartylǵan.
