Elordalyq sheneýnikterdiń qaısysy qyzmettik taksıdi shaqyrta alady
ASTANA. QazAqparat - Elorda ákimdigi sheneýnikteriniń qaısysy qyzmettik taksıdi shaqyrý quqyǵyna ıe bolady? Bul suraqqa Astana qalalyq ortany regeneratsııalaý basqarmasynyń basshysy Ǵanı Isqalıev elorda ákimdiginiń baspasóz ortalyǵynda ótken brıfıngte jaýap berdi, dep habarlaıdy QazAqparat tilshisi.
«Taksıdi basshylar men onyń orynbasarlary ǵana emes, sapar jumys babymen bolǵan jaǵdaıda lımıt aıasynda kólik shaqyrýǵa quqyly kez kelgen memlekettik organ qyzmetkeri shaqyra alady. Onyń bári tirkeledi: kimniń qońyraý shalǵany, kimniń tapsyrys bergeni, qaıda bergeni tirkelip otyrady. Aıdyń sońynda monıtorıng júrigiziledi. Aı saıyn kompanııa, bizdiń seriktester qyzmetkerlerdiń qaıda barǵanyn kórsetip otyrady», - deıdi Ǵanı Isqalıev.
Onyń aıtýynsha, saparlardyń monıtorıngi kún saıyn júrgiziledi.
«Biz kún saıyn monıtorıng júrgizemiz - kimniń qaıda barǵany, dál sol kezde jumys babymen shyqqany-shyqpaǵany qaralady. Lımıtteriniń bitip kele jatqanyn basqarmalarǵa aldyn ala habarlap otyramyz. Eger lımıt bitip qalǵan jaǵdaıda - amal joq, jaıaý júrýge týra keledi», - deıdi Ǵanı Isqalıev.
Basqarma basshysy, sonymen birge, qarajatty únemdeý turǵysynda sóz qozǵady.
«Ótken jylǵy shyǵyndardy esepke ala otyryp, biz jylyna 120-150 mln teńgeni únemdeıtin bolamyz. Sonda 5 jylda 600 mln teńgeni únemdeımiz. Ol qarajat basqa áleýmettik maqsattarǵa jumyldyrylady. Mekteptegi tamaqtandyrý, múmkindigi shekteýli jandardyń qala ishinde jeńildikpen júrýi sekildi qajettiligimiz óte kóp. Olardyń bárine qarajat kerek», - deıdi Ǵanı Isqalıev.
Eske sala ketsek, buǵan deıin astanalyq ákimdiktiń 2018 jyldan bastap taksı qoldaný boıynsha pılottyq jobaǵa aýysatyny habarlanǵan edi. Osy jyldyń qyrkúıek aıynda qala ákimdigi qyzmettik kólikterden bas tartqaly otyr.
