Elordalyq saıabaqta Otbasy kúnine arnalǵan jarystar ótti
ASTANA. QazAqparat - Elorda turǵyndary men qonaqtary Otbasy kúnin merekeleýde. Búgin Astanalyq parkte jeti komanda kóńildi jarystarda básekege tústi, dep habarlady astana.gov.kz.
Sporttyq merekege balalar men eresekter qatysty. Ata-analar men balalar eptilik pen jyldamdyq qabiletterin kórsetetin jarystarda synǵa tústi. Kóńildi start baǵdarlamasyna asyq atý men arqan tartý sııaqty ulttyq oıyndar da endi.
- Halyqaralyq otbasy kúni 1993 jyly bekitilip, jyl saıyn 15 mamyrda atalyp ótiledi. Biz otbasylyq jarystar, saıahattar jáne t.b ótkizemiz. Bul joly mereke saıabaqta jattyǵý jasaýdan bastaldy. Sodan keıin kezek jarystarǵa berildi, - dedi Astana qalasy salaýatty ómir saltyn qalyptastyrý ortalyǵynyń dırektory Aqmaral Qurmanbaeva.
Ádenovter áýleti osy sııaqty buqaralyq sharalarǵa búkil otbasymen qýana qatysady. Olar búgin de tys qalǵan joq.
- Ádettegideı búkil otbasymyzben - beseýimiz keldik. Ár demalys saıyn taza aýaǵa shyǵyp otyrýǵa tyrysamyz, qalalyq saıabaqtarda uıymdastyrylatyn oıyn-saýyqtarǵa qatysyp júremiz. Osyndaı qyzyqty sporttyq jarystar ótkizý - tamasha ıdeıa, mundaı sharalardy jıi uıymdastyrǵan durys, - dep Asqar Áden óz pikirimen bólisti.
Sharaǵa taekvondodan Qazaqstan federatsııasynyń vıtse-prezıdenti, Beıjińdegi Olımpıada oıyndarynyń qola júldegeri Arman Shylmanov ta keldi.
- Sport pen dene shynyqtyrý - densaýlyqqa paıdaly, adamdardyń búkil otbasymen birge salaýatty ómir saltyn ustanatyny qýantarlyq jaıt, - deıdi sportshy.
Eske salaıyq, 8 mamyrdan bastap Astanalyq parkte demalys kúnderi ashyq aspan astynda buqaralyq sporttyq jáne fıtnes jattyǵýlar jasaý uıymdastyrylyp keledi. Tájirıbeli nusqaýshylardyń jetekshiligimen ıoga, zýmba jáne krossfıtten sabaq alýǵa bolady.
