Elordalyq saıabaqta Olımpıadashylar alańy bolmaq
ASTANA. QazAqparat - Qala saǵaty, Dańq alleıasy jáne amerıkandyq tóbeshik. Astanada elorda kúnine qaraı osynyń bári de bolmaq. Ortalyq saıabaqta qazirdiń ózinde aýqymdy jańǵyrtý jumystary bastalyp ketti, dep habarlady «7 arna».
Astananyń ortalyq saıabaǵynyń elordalyq kezeńinde alǵash ret aýqymdy jańǵyrtý jumystary júrgizilýde. Mundaǵy aıshyqty oryn steladaǵy saǵat bolmaq. Sonymen birge, burynǵydan da bıik jańa aınalany sholý dóńgelegi jáne kópten kútken amerıkandyq tóbeshik bolady.
Qurylysshylar sáýletshilerdiń ıdeıalaryn merziminde oryndap shyǵýǵa kúsh salady. Metall qurastyrmaǵa Astananyń bolashaq kórnekti orny - saǵat ilindi. Stelanyń aınalasyndaǵy tórt qýys, jyldyń tórt mezgilin beıneleıdi, deıdi joba avtorlary.
«Sondaı-aq jobada sý arnasyn jańartý kózdelgen, biz ony 25 metrge deıin keńeıtemiz, arnadaǵy qus aralyn saqtap qalamyz, onda úsh túrli kópir ornatylady», - dep áńgimeleıdi joba sáýletshisi Evgenııa Petrova.
Saǵattan saıabaqqa alleıa jalǵasady, munda bulaqtar, jańa sýburqaqtar bolady. Qazirgi aǵashtarǵa qosa jazǵa qaraı qaıyń, qaraǵash, jóke kóshetteri egiledi.
«Bul saıabaqta 10 myńdaı aǵash bolýy tıis. Olardyń 1400-i qylqan japyraqty, qalǵandary japyraqty aǵashtar - aq qaıyń, jóke, taǵy basqa túrleri» - deıdi Astana qalasynyń energetıka jáne kommýnaldyq sharýashylyq basqarmasy basshysynyń orynbasary Nurlan Soltanbaev.
Sondaı-aq saıabaqta óziniń olımpıadashylar alańy bolmaq, onda qazaqstandyq chempıondar men júldegerlerdiń tizimi jazylady. Munda adamdar sportpen jáne belsendi demalyspen aınalysýǵa jaǵdaı jasalady.
