Elordalyq prokýrorlar qorǵanshylyq jáne qamqorshylyq organdarynyń qyzmetine narazy
ASTANA. Tamyzdyń 13-i. QazAqparat /Aıdar Ospanalıev/ - Qamqorshylyq jáne qorǵanshylyq organdary tarapynan qaraýsyz qalǵan balalarǵa qatysty tıisti sharalar qoldanylyp jatqandyǵyna qaramastan, bul salanyń qyzmeti boıynsha júrgizilgen tekserýler onda birshama zańsyzdyqtardyń da oryn alǵandyǵyn kórsetip otyr.
Bul týraly búgin atalmysh tekserýlerdiń nátıjesi jóninde jýrnalıstermen kezdesken Astana qalalyq prokýrorynyń kómekshisi Olga Ionova málim etti.
Onyń derekterine qaraǵanda, zań buzý áreketteri balalardy áleýmettik jaǵynan qorǵaý salasy boıynsha jáne olardyń jeke menshikterine qatysty buzylyp otyr. «Keı jaǵdaılarda ınternat mekemelerindegi balalardyń quqyqtyq mártebeleri belgilenbegen. Bul rette aıta ketetin másele ınternatqa ornalastyrylǵan balanyń onda ne úshin ornalastyrylǵandyǵynyń sebebi bolýy kerek. ıAǵnı ınternattaǵy balanyń ata-anasy ata-analyq quqynan aıyrylǵan bolýy tıis, nemese olar bas bostandyǵynan aıyrý oryndarynda jazasyn ótep jatqan bolýy kerek. Bolmasa, ata-anasynyń júrgen jeri belgisiz bolýy kerek. Mundaı jaǵdaıda ıaǵnı balaǵa asyraýshysynan aıyryldy degen sebeppen memlekettik bıýdjetten tıisti járdemaqy bólinedi. Sondaı-aq asyraýshysynan aıyryldy degen mártebesi bar bala quzyrly organdar arqyly baspanamen qamtylýǵa quqyly. Al mundaı mártebe bolmaǵan jaǵdaıda bala ınternattan bosatylǵan soń memleket tarapynan beriletin barlyq kepildikter men jeńildikterden aıyrylady. Sondyqtan tekserýler barysynda osy máselege basa nazar aýdaryldy», dedi prokýrordyń kómekshisi.
Onyń sózine qaraǵanda, asyraýshysyz qalǵan balalardyń ómirine qatysty taǵy bir másele - tıisti zańdarda kórsetilgendigine qaramastan, elimizdegi ınternattarda jatqan kóptegen balalar alıment pen járdemaqy almaı júr. «Barshaǵa málim, qazirgi tańda elimizde ıývenaldy ıýstıtsııa salasy damyp kele jatyr. Atalmysh organ qaraýsyz qalǵan balalardyń anasyna nemese ákesine óziniń kemshiligin túzeýge, sóıtip ata-analyq quqyn qalpyna keltirýge birshama ýaqytqa ruqsat beredi. Al qamqorshylyq jáne qorǵanshylyq organdary balalardyń ata-analaryna berilgen ýaqyttyń ótip ketkendigine qaramastan, olar ata-analyq quqyqtarynan aıyrý jóninde tıisti sharalar qoldanbaýda. Bul qamqorshylyq jáne qorǵanshylyq organy qyzmetkerleriniń baqylaýsyz ketkendigin kórsetedi», dedi prokýrordyń kómekshisi.
