Elordalyq polıtsııa polkovnıgi zańsyz júrgen ózbekterge jeke úıin saldyrǵan
ASTANA. QazAqparat - Astana qalalyq ІІD kadr jumys basqarmasynyń jeke quram jónindegi ınspektsııa bastyǵy Ótepbergen Tynymbaev zańsyz ózbekterdiń eńbegin paıdalanǵan, dep habarlady departament baspasóz qyzmetinen.
«Júrgizilgen qyzmettiń tergeý amaldary barysynda Ó.Tynymbaevtyń Internatsıonalnyı eldi mekenindegi úıin saldyrý úshin Ózbekstan Respýblıkasynan zańsyz eńbek mıgranttaryn tartqandyǵy belgili boldy. Oǵan qosa onyń nusqaýymen qurylys materıaldaryn polıtsııa qyzmetkerleri jetkizip berip otyrǵan. Dál osy maqsattarǵa Ó.Tynymbaev qyzmettik kólikterdi paıdalanǵan», delingen habarlamada.
Sonymen qatar baspasóz qyzmetiniń taratqan aqparatyna qaraǵanda, ol ózine tıesili qyzmettik páterdi qosymsha zańsyz tabys alý úshin jalǵa bergen.
«Quqyq qorǵaý organdarynyń bedeline nusqan keltiretin áreketteri, sonymen birge jeke paıdasy úshin qyzmettik ókilettigin asyra paıdalaný túrindegi jemqorlyq quqyq buzýshylyq jasaǵany úshin Astana qalalyq ІІD kadr jumys basqarmasynyń jeke quram jónindegi ınspektsııa bastyǵy Ó.Tynymbaev quqyq qorǵaý organdarynan shyǵaryldy», - deıdi ІІD baspasóz qyzmetinen.
Ó.Tynymbaev ishki ister organdarynan ózin jumystan shyǵarý týraly buıryqty zańsyz dep taný úshin Saryarqa aýdandyq sotyna júgindi. 7 naýryz kúni aýdandyq sot Ó.Tynymbaevtyń aryzyn qanaǵattandyrdy.
«Ó.Tynymbaev jasaǵan tártiptik is-áreketterdiń anyq baıqalatyndyǵyn eskergen Astana qalalyq ІІD atalǵan sot sheshimin negizsiz dep sanaıdy», - delingen habarlamada.
