Elordalyq polıtseıler úı-kúısiz azamattarǵa kómek kórsetýde
ASTANA. QazAqparat - Astana qaalyq ІІD jergilikti polıtsııa qyzmetiniń ókilderi belgili turaǵy joq tulǵalardyń týystyq baılanystaryn anyqtaýda. Qatty aıazǵa baılanysty ýchaskelik ınspektorlar, jol-patrýldik qyzmet polkiniń ınspektorlary qıyn jaǵdaıǵa tap bolǵan, úı-kúısizder tabylýy múmkin oryndar - jylý qubyrlaryn, jertólelerdi, ıesiz qalǵan saıajaılardy tekserdi, dep habarlaıdy QazAqparat Astana qalasy ákimdiginiń baspasóz qyzmetine silteme jasap.
«Qańǵybas» jedel-aldyn alý sharasyn ótkizý kezeńinde qarashanyń 18-inen 19-yna deıin Astana qalalyq jergilikti polıtsııa qyzmeti belgili turaǵy joq 50-den asa adamdy polıtsııaǵa jetkizgen. Jeke tulǵalary anyqtalyp, quqyq buzýshylyqtar men qylmystarǵa qatystylyǵy tekserilgen soń olardyń árqaısysymen quqyq buzýshylyqtardy boldyrmaý boıynsha áńgime júrgizildi.
Azamattardyń bir bóligi medıtsınalyq-áleýmettik ońaltý ortalyǵyna, qalǵany áleýmettik, medıtsınalyq jáne zańgerlik kómek kórsetý úshin jáne jumys taýyp berý úshin áleýmettik beıimdeý ortalyǵyna jetkizildi. Elordaǵa jumys isteý úshin Temirtaýdan jáne Qostanaı oblysynan kelgen eki azamatqa úılerine oralýǵa kómek kórsetildi.
