Elordalyq polıtseıler urlanǵan múlikter saýdalanǵan oryndardy anyqtady

NUR-SULTAN. QazAqparat – Trátip saqshylary aldyn alý is-sharasy ótkizilgen úsh kún ishinde urlanǵan múlikti ótkizetin 180-ge jýyq oryn, onyń ishinde 133 lombardty anyqtady, dep habarlaıdy QazAqparat Nur-Sultan qalasynyń polıtsııa departamentiniń baspasóz qyzmetine silteme jasap.

Polıtsııanyń mobıldi toptary patrýldeý kezinde barak tıptes úılerdegi 500-ge jýyq jalǵa alynǵan páterdi tekserdi. Jedel aldyn alý is-sharalaryn júrgizý kezinde 22 qylmys, onyń ishinde 5 urlyq ashyldy.

Osylaısha, qyzmetkerler uqsas shema boıynsha urlyq jasaǵan eki páter urysyn ustady. Kúdiktiler turǵyn úılerdiń qulyptalmaǵan esikterin izdep taýyp, qylmystyq áreketterin júzege asyratyn bolǵan. Qaraqshylar asa saqtyqpen áreket etip, esikti shamadan tys shý shyǵarmaı teksergen. Osylaısha, 24 jastaǵy kúdikti tús áletinde jataqhana bólmesinde uıaly telefon urlaǵan. Bul ýaqytta telefon ıesi bólmede uıyqtap jatqan. Taǵy bir jaǵdaıda 29 jastaǵy kúdikti Baıqońyr kóshesindegi jeke úıden jalpy quny jarty mıllıon teńgeden asatyn «Samsýng» jáne «Hýaveı» markaly eki telefondy urlaǵan.

Jedel-izdestirý is-sharalary barysynda urylar ustalyp, polıtsııa departamentiniń ýaqytsha ustaý ızolıatoryna qamaldy. Qylmystyq ister boıynsha sotqa deıingi tergeý amaldary júrgizilýde. Zattaı dáleldemeler alynyp, ıelerine qaıtaryldy.

Nur-Sultan qalasynyń polıtsııa departamenti bólmelerdiń, páterlerdiń esigin qulyptap júrýge jáne qyraǵy bolýǵa keńes beredi.