Elordalyq polıtseıler Túrkııa azamatyna joǵalǵan tólqujatyn qaıtaryp berdi
ASTANA. QazAqparat - Polıtseıler Túrkııa azamatyna joǵalǵan tólqujatty qaıtaryp berdi, dep habarlady Astana ІІD baspasóz qyzmetinen.
«29 maýsymda ІІD izdestirý ortalyǵyna Túrkııa azamatynyń joǵalǵan qujaty kelip tústi. Qalalyq saıabaqta oryndyqta bir áıel shetel qujatyn taýyp alyp, ony polıtsııaǵa aparyp bergen. Polıtseı sheteldikti birden anyqtady. Ol qujatyn taýyp bergen Astana turǵynyna jáne elordalyq polıtseılerge úlken alǵys bildirdi», - delingen habarlamada.
Tabylǵan qujattar týraly aqparat ІІD resmı saıtynda aı saıyn jarııalanatyny atap ótiledi. Saıtta óz qujattaryn tapqan azamattar Іzdestirý bıýrosyna habarlasa alady.
