Elordalyq polıtseıler fýtbol alańynda memlekettik qyzmetkerlermen sheberlik baıqasty
ASTANA. QazAqparat - Q. Muńaıtpasov atyndaǵy ortalyq stadıonda elorda ákimdigi men qalalyq ishki ister departamenti komandalarynyń arasynda fýtboldan «Dostyq kýbogy» jarysy ótti. Joldastyq kezdesý qalalyq tártip saqshylarynyń paıdasyna sheshildi, dep habarlady Astana qalasy ákiminiń resmı saıty.
Sporttyq jarys qazaqstandyq polıtsııa kúni men memlekettik qyzmetshiler kúnin merekeleý aıasynda uıymdastyryldy, sondaı-aq, salaýatty ómir saltyn nasıhattaýǵa jáne korporatıvtik rýhty nyǵaıtýǵa baǵyttalǵan. Alǵashqy joldastyq kezdesý byltyr ótkizilip, match 2:2 esebimen teń aıaqtalǵan bolatyn.
Bıylǵy kezdesý tartysty ótti. Qos komandanyń ókilderi jańbyrǵa qaramastan bir-birine des bermedi.
Astana qalasy ákiminiń orynbasary Ermek Amanshaev pen Astana qalasy ishki ister departamentiniń bastyǵy Amantaı Áýbákirov jarysqa qatysýshylardy quttyqtap, sóz sóıledi.
- Jańa ǵana Astana qalasy ákimdiginiń memlekettik qyzmetkerleri men qalalyq ishki ister departamenti qyzmetkerleriniń arasynda memlekettik qyzmetkerler kúni men Іshki ister organdarynyń qurylǵan kúnine arnalǵan dostyq fýtboldan kezdesý aıaqtaldy. Oıyn óte tartysty boldy. Astana qalasynyń ákimdigi 2:0 esebimen jeńilip qalǵanymen, oǵan eshqandaı ókinish joq. Astana qalasynyń turǵyndaryn, onyń ishinde, memlekettik qyzmetkerlerdi, ishki ister organdarynyń qyzmetkerlerin erteńgi osy merekelerimen shyn júrekten quttyqtaımyz. Jas memleketimizdiń damýyna, jas astanamyzdyń damýyna etip jatqan eńbekterińiz árdaıym jemisti bolsyn. Alda da úlken tabystarǵa jete berińizder. Osyndaı jarystarda árqashan dostyq jeńe bersin, - dedi Astana qalasy ákimdiginiń Ádep jónindegi ýákili Bekqadamov Rahat.
Sonymen qatar, alańda erekshe kózge túskender túrli nomınatsııalar boıynsha marapattaldy. Astana qalasynyń ІІD Jedel basqarý ortalyǵynyń bólim bastyǵy Jeńis Bektaev «Úzdik qaqpashy», Tergeý basqarmasynyń bólim bastyǵy «Úzdik shabýyldaýshy», oqý-jattyǵý rotasy komandıriniń orynbasary Ardaq Amantaev «Úzdik qorǵaýshy», №8 BJSM dırektory Erbol Koshanov «Úzdik oıynshy» atandy.
- Qazaqstan Respýblıkasy ishki ister mınıstrliginiń meıramyna oraı joldastyq kezdesý ótti. Sportqa jaqyn bolǵandyqtan ishki ister departamentiniń fýtbolshylary 2:0 esebimen jeńiske jettik. Osyndaı jarystar kóp bola bersin, elimiz aman, halqymyz tynysh bolsyn. Jarystan jarysqa jete bereıik, dedi óz áriptesterin quttyǵan Іshki ister departamentiniń AJÁO ınspektory Eńsepov Danııar.
Úzilis kezinde qoldanbaly sport túrlerinen alty kezeńdik polıtseılik estafeta ótkizildi. Birinshi kezeńde - PM-9 mm tolyq emes buzý/jınaý, stadıondy aınalyp, 450 m júgirý. Ekinshi kezeń - gazqaǵarmen 200 m júgirý. Úshinshi kezeń - zembilmen 200 m júgirý. Tórtinshi kezeń - 200 m júgirý. Besinshi kezeń - rollıkpen 800 m júgirý. Altynshy kezeń - 150 m qashyqtyqqa tolyq áskerı kerekti jabdyqtarmen jáne kıimmen júgirý.
Kelesi kezdesýge deıin «Dostyq kýbogy» Astana qalasynyń Іshki ister departamentinde bolady.
