Elordalyq polıtseıler er adamdy sýıtsıdten qutqardy
NUR-SULTAN. QazAqparat- Elorda turǵyny balkonnan sekirmek bolǵan, degenmen tártip saqshylary der kezinde tıisti shara qabyldady, dep habarlaıdy QazAqparat.
«5 qazan kúni túngi saǵat 01:30-dar shamasynda polıtsııaǵa Nájimedenov kóshesindegi páterde aıǵaı-shý bolyp jatqandyǵy týraly habar kelip tústi. «102» nómirine habarlasqan páter kórshisi er adamnyń qyz balaǵa kúsh kórsetip jatqandyǵyn málim etti. Polıtsııa qyzmetkerlerin kórgen er adam balkonnan sekirmek boldy. Degenmen tártip saqshylary azamatty der kezinde raıynan qaıtaryp, ony tutqyndady. Qazir tekserý sharalary júrip jatyr, onyń nátıjesinde er adamnyń áreketi boıynsha quqyqtyq turǵydan baǵa beriletin bolady», - delingen qalalyq Polıtsııa departamentiniń habarlamasynda.
