Elordalyq polıtseıler bir táýlikte 86 qylmysty ashty

NUR-SULTAN. QazAqparat – Elordalyq polıtseıler bir táýlik ishinde 86 qylmysty izin sýytpaı ashty. Bul týraly elordalyq polıtsııa departamentiniń resmı ókili Danııar Oralov aıtyp berdi, dep habarlaıdy QazAqparat.

«Ótken aptada 115 qylmys jasaldy. Onyń 86-syn polıtseıler táýlik ishinde ashty. Polıtsııa densaýlyqqa aýyr zııan keltirýge baılanysty úsh qylmysty, 9 alaıaqtyq faktisin, eki tonaýdy, bir avtokólik urlaýdy, 25 bótenniń múlkin urlaýdy jáne esirtkige qatysty 13 qylmysty ashty», - dedi resmı ókil.

Sonymen birge, ótken aptada elordada 594 jol-kólik oqıǵasy tirkelgen. Bir adam qaza taýyp, 10 adam aýyr dene jaraqatyn alǵan.

Polıtsııa departamenti júrgizýshilerdi jolda sergek bolýǵa shaqyrýda.

Al aqpan aıynda iske qosylǵan «102» mobıldi qosymshasy arqyly polıtsııa operatorlary myńnan astam ótinishti qabyldady.