Elordalyq polıtseıler 9 mln teńgelik kabel urlaǵan kúdiktilerdi ustady
NUR-SULTAN. QazAqparat – Nur-Sultan polıtseıleri elektr tizbeginiń mys kabelin urlaý faktisi boıynsha 32 jáne 29 jastaǵy eki kúdiktini ustady, dep habarlaıdy QazAqparat Nur-Sultan qalasy PD baspasóz qyzmetine silteme jasap.
Túngi ýaqytta qaskúnemder jańa qurylys aýdanyndaǵy qudyqtardy ashyp, trotýar taqtasyn syndyryp, kabel jatqan tonneldi qazǵandyǵy anyqtaldy.
Osylaısha 100 metr mys kabelin qıyp, ony metall qabyldaý pýnkine 475 myń teńgege ótkizedi. «Qaskúnemder elektr kabeli ornalasqan jerdi aldyn ala zerttep, symnyń qalaı turǵanyn bilip alǵan. Olar óz áreketterin naqty belgilep, qandaı quraldar qajet ekenin de josparlaǵan. Keltirilgen zalal somasy shamamen 9 mıllıon teńge», - deıdi Nur-Sultan qalasy PD Krımınaldyq polıtsııa basqarmasy bastyǵy Dmıtrıı Demıdov.
Kúdiktiler PD ýaqytsha ustaý ızolıatoryna qamalyp, «Urlyq» baby boıynsha qylmystyq is qozǵaldy. Olar óz kinásin moıyndady, eki kabel urlaý faktisi boıynsha aıyptalyp otyr. Ustalǵandar buryn uqsas qylmys jasaǵany úshin sottalǵan bolyp shyqty.
Jyldyń basynan beri qala aýmaǵynda 38 kabel urlaý faktisi tirkelip, 20 urlyq ashylyp, 7 fakti boıynsha tártip saqshylary jedel-izdestirý sharalaryn júrgizýde. Elordalyq polıtseıler tústi jáne qara metaldardy, olardyń synyǵy men qaldyqtaryn ótkizý, zańsyz aınalymǵa salý oryndaryn únemi tekserip otyrady.
