Elordalyq polıtseıler 22 jyl buryn bolǵan qylmysty ashyp, kinálini tapty
NUR-SULTAN. QazAqparat - Kóp jyl burynǵy qylmystardyń birin zerdeleý barysynda polıtsııa qyzmetkerleri jańa faktilerdi anyqtaý úshin kóp jumys atqardy. Nátıjesinde kúdiktilerdiń sońyna túsip, 20 jyl buryn jasalǵan qylmysty ashty, dep habarlaıdy QazAqparat polıtsııa departamentiniń baspasóz qyzmetine silteme jasap.
1997 jyldyń naýryzynda jeke úıde zorlyq-zombylyq belgileri bar egde áıeldiń máıiti tabylǵan. Kisi óliminen bólek, áıeldiń úıinen baǵaly zattar joǵalǵan. Polıtsııa qyzmetkerleri búgingi tańda keńinen qoldanyp júrgen jańa tehnologııalardy jáne tehnıkalyq quraldardy qoldaný arqyly qylmystyq isti ashty.
Arada 22 jyl ótkende Nur-Sultan qalasy PD krımınaldyq polıtsııa qyzmetkerleri qylmysty qaıta qaraý kezinde atalǵan oqıǵa qatysýshylarynyń birine shyqty. Ol - urlyq jasap, esirtki taratqany úshin birneshe ret sottalǵan, 1971 jyly týǵan azamatsha A. Áıel atalmysh qylmys jasalǵan kezde 26 jasta bolǵan.
«Áıeldiń qazirgi turatyn jeri anyqtaldy. Ol 20 jyldan astam ýaqyt elordada turyp kelgen. Sotqa deıingi tergep-tekserý barysynda azamatsha A. bárin moıyndap, ókinetini týraly ótinish jazdy. Onda ol kisi óltirdi dep birneshe ret sottalǵan óziniń dosy, 1970 jyly týǵan azamat N. kórsetken. Ol áıeldi qorqytý arqyly qylmys týraly eshkimge aıtpaýǵa kóndirgen. Áıel baıandaǵan faktilerge súıene otyryp, polıtsııa qyzmetkerleri N-nyń esirtki qoldanǵanyn jáne qaıta-qaıta aqshaǵa muqtaj bolǵanyn anyqtady» delingen habarlamada.
Tergep-tekserý barysynda kúdiktiniń kinási tolyqtaı dáleldendi.
