Elordalyq páter tonaǵan urylardy ustaýǵa kómektesti
NUR-SULTAN. QazAqparat - Óziniń páterindegi terezeden kúdikti eki er adamdy kórgen elordalyq turǵyn polıtsııaǵa ýaqtyly habar berip, urylardyń qylmysynyń jolyn kesti, dep habarlaıdy QazAqparat qalalyq polıtsııa departamentiniń baspasóz qyzmetine silteme jasap.
«Nur-Sultan qalasynyń Sembınov kóshesiniń turǵyny tańǵy bestiń shamasynda óziniń páterindegi terezeden kúdikti eki er adamdy kóredi. Ol birden «102» nómirine qońyraý shalǵan. Nátıjesinde urylar oqıǵa ornynda qolǵa tústi», - delingen departamenttiń habarlamasynda.
Belgili bolǵandaı, kúdiktiler páterge kiltti sáıkestendirý arqyly kirip, «LG» markaly teledıdar, uıaly telefondy qoldy qylǵan. Páterden endi shyqpaqshy bolyp jatqanda, polıtsııa qyzmetkerleri olardy qolǵa túsirgen.
«Kúdiktiler buryn sotty bolǵan 33 jáne 32 jasar qala turǵyny bolyp shyqty. Qazirgi ýaqytta «urlyq» baby boıynsha sotqa deıingi tergep-tekserý amaldary júrgizilýde. Aıǵaqty zattar tárkilendi. Olardyń ózge de qylmystarǵa qatysy bar-joǵy tekserilýde. Kúdiktiler Nur-Sultan qalasynyń ýaqytsha ustaý ızolıatoryna qamaldy», - dep habarlaıdy departamentten.
Polıtsııa qyzmetkerleri kómek kórsetken Asylbek Jabagınge qylmys ashýda kórsetken kómegi úshin alǵys hat tabys etti.
