Elordalyq oqýshylarǵa 34,5 myń kompıýter satyp alynady
NUR-SULTAN. QazAqparat - Turmysy tómen otbasydan shyqqan oqýshylardy kompıýtermen qamtamasyz etý úshin 6 mlrd teńge bólindi.
Bul týraly pedagogıka qyzmetkerleriniń tamyz keńesinde elorda ákimi Altaı Kólginov aıtty, dep habarlaıdy QazAqparat tilshisi.
«Elordalyq barlyq bilim berý uıymdarynda jańa oqý jyly qashyqtan bastalady. Ata-analardyń ótinishi boıynsha 1-4 synyp oqýshylary úshin «kezekshi synyptardyń» jumys isteýin josparlap otyrmyz. Bul rette barlyq sanıtarlyq sharalar qatań saqtalady. Pedagogterdiń 30 paıyzǵa jýyǵy shtattyq rejımde, onyń ishinde kezekshi toptarda sabaq berý úshin jumysqa shyǵady», - dedi ol.
Onyń aıtýynsha, halyqtyń áleýmettik osal toptarynan shyqqan balalar qyrkúıekte kompıýterlermen jáne roýterlermen qamtamasyz etiletin bolady.
«Osy maqsatta 6 mlrd teńge bólinedi. Budan basqa, birqatar áleýmettik sharalar qolǵa alyndy. Atap aıtsaq, jalpyǵa mindetti oqý qory aıasynda árbir oqýshyǵa mektep quraldaryn satyp alýǵa 40 myń teńgeden bólemiz. 7 myń bala «Mektepke jol» aktsııasymen qamtylady. Sondaı-aq, balabaqshalardaǵy «kezekshi toptardyń» jumysyn jalǵastyrýdy josparlap otyrmyz», - dedi Altaı Kólginov.
