Elordalyq oqýshylar jazǵy kanıkýlda «Jasyl el» jasaǵynda jumys isteı alady
NUR-SULTAN. QazAqparat – Elordalyq oqýshylar men kolledj stýdentteri jazǵy kanıkýlda «Jasyl el» jasaǵynda jumyspen qamtylady, dep habarlaıdy QazAqparat tilshisi.
Bul týraly Nur-Sultan qalasy Bilim berý basqarmasy basshysynyń orynbasary Rımma Imanǵazınova aıtyp berdi.
«Jasyl el» áleýmettik jastar jobasy aıasynda mektepter men kolledjderdiń 14-18 jastaǵy oqýshylary bıylǵy 1 maýsym – 10 tamyz aralyǵynda jazǵy kezeńde jumyspen qamtylady. Kópbalaly, az qamtylǵan otbasylar, ıývenaldyq polıtsııada esepte turǵan balalar jáne jetim balalar qatarynan 700-ge jýyq balany quraıdy», - dedi R. Imanǵazınova elorda ákimdiginde ótken onlaın brıfıngte.
Baǵdarlama aıasynda mekteptermen shart jasalady, balalar mektep janyndaǵy ýchaskelerde jumys isteıdi, mektep aýmaǵyn kógaldandyrýmen aınalysady.
Joba boıynsha ár balaǵa 60 myń teńge kóleminde aqshalaı syıaqy qarastyrylǵan.
Budan basqa, 1 maýsym men 25 tamyz aralyǵynda balalarǵa bilim berý uıymdary bazasynda onlaın alańdar qoljetimdi bolady. Naqty qurylǵan jumys balalarǵa tańerteńnen bastap, qyzyqty jáne paıdaly bilim alýǵa múmkindik beredi. Munda balalar baǵdarlamalaý, dızaın, júıelik basqarý, oıyndar ázirleý jáne basqa da IT-baǵyttarda ózderin synap kóre alady. Sondaı-aq, bolashaq 1-synyp oqýshylaryn daıarlaý maqsatynda ár mektepte tamyzdan bastap, eki aptalyq «Balaqaı» mektebi uıymdastyrylady.
Aıta keteıik, bıyl balalar úshin jazǵy demalys QR BǴM usynǵan «Qazaqstan balalary – jazdy qýanyshqa toltyraıyq» taqyrybymen uıymdastyrylady.
1-30 maýsym aralyǵynda Oqýshylar saraılary janynda jazǵy demalys akademııasynda, kórkem jáne mýyzkalyq mektepterde, tehnıkalyq jáne shyǵarmashylyq ortalyqtarda, «Art tumar» ortalyǵynda úıirmeler men sektsııalar ashylady.
26 mamyrdan 19 maýsymǵa deıin ata-analardyń ótinishimen oqytý sapasyn arttyrý jáne shekteý sharalary kezindegi bilim alýda jiberilgen olqylyqtardyń ornyn toltyrý úshin onlaın-offlaın rejıminde jazǵy mektep uıymdastyrylady.
