Elordalyq oqýshylar QHR-da ótken olımpıadada 4 altyn medal jeńip aldy
ASTANA. QazAqparat - Búgin matematıkadan XVII Batys-Qytaı olımpıadasynyń jabylý saltanaty ótti. Atalmysh olımpıada 11-16 tamyz aralyǵynda QHR, Sychýan eldi mekenine qarasty Nanchýn qalasynda ótti, dep habarlaıdy Astana ákimdiginiń baspasóz qyzmeti.
Olımpıadaǵa Qytaı, Indonezııa, Fılıppın, Sıngapýr jáne Qazaqstan elderinen 345 jas matematık qatysty. Qazaqstannyń qurama komandasy atynan daryndy balalarǵa arnalǵan mamandandyrylǵan mekteptiń 4 oqýshysy qatysty.
Olımpıada qorytyndysy boıynsha, Astana qurama komandasynyń qorjynynda 4 altyn medal bar. Altyn medalǵa ıe bolǵandardyń biri - Astana qalasy «Bilim-ınnovatsııa» lıtseı-ınternatynyń 10 synyp oqýshysy Qudaıbergen Álıhan jarys barysynda bárinen ozyp, joǵary nátıje kórsetti.
