Elordalyq oqýshylar qandaı platformalar arqyly bilim alyp jatyr
NUR-SULTAN. QazAqparat - Nur-Sultan qalalyq bilim basqarmasynyń basshysy Sholpan Qadyrova elordalyq oqýshylar qandaı platformalarda bilim alyp jatqandyǵyn aıtty, dep habarlaıdy QazAqparat tilshisi.
«Nur-Sultan qalasynyń orta bilim berý uıymdarynda qashyqtan oqytýdy júzege asyrý úshin sınhrondy jáne asınhrondy sabaqtardy ótkizý múmkindigi bar Bilimland nemese OnlineMektep jáne DarynOnline otandyq ınternet platformalary paıdalanylady», - dedi ol elorda ákimdiginde ótken baspasóz máslıhatynda.
Onyń aıtýynsha, Bilimland (OnlineMektep) – oqýshy, muǵalim jáne ata-analarmen tyǵyz qarym-qatynas jasaýǵa múmkindik beretin qashyqtyqtan oqytý júıesi. Sabaq kestesi, tapsyrmalar portalǵa júkteledi. Oqýshylar platformaǵa kirip qajetti taqyrypty tańdaıdy, sonymen qatar sabaqtyń konspektisimen tanysa alady. OnlineMektep.org-tyń mazmuny mektep pánderi boıynsha 100 000-nan astam jattyǵýlary bar 5700 sabaqtan turady. Búgingi tańda 62 mektep kelisimshart jasap, osy platformada belsendi jumys isteýde. Al Daryn.online – qashyqtyqtan bilim berýge arnalǵan platforma. Onda oqýshylardyń derekterin hakerlik shabýyldardan qorǵaýdyń joǵary dárejesin rastaıtyn halyqaralyq sertıfıkat bar.
Daryn.online-nyń mazmuny 6500 sabaq pen 65 000 test tapsyrmalaryn qamtıdy. Búgingi tańda 40 mektep kelisimshartqa otyrdy.
«Sondaı-aq, barlyq bilim berý uıymdarynyń pedagogtary men oqýshylary MicrosoftTeams baǵdarlamasyn tegin paıdalana alady. Búgingi kúni OnlineMektep alańynda 37 myńǵa jýyq, DarynOnline platformasynda 28 myńǵa jýyq sınhrondy sabaqtar ótkizildi. Kundelik.kz júıesi úı tapsyrmalaryn berý jáne keri baılanys qyzmetin atqarady», - dedi Sholpan Qadyrova.
