Elordalyq oqýshylar qandaı platformada bilim alady
NUR-SULTAN. QazAqparat - Elorda oqýshylary BilimLand jáne Daryn.online platformalarynda bilim alady. Bul týraly Nur-Sultan qalalyq bilim basqarmasynyń basshysy Sholpan Qadyrova aıtty, dep habarlaıdy QazAqparat tilshisi.
«Qashyqtan oqytý formatyna keler bolsaq, barlyq mektepterde BilimLand bilim platformasyn paıdalanýǵa kelisimshart jasaldy. Sonymen qatar elordanyń 40 mektebinde Daryn.online platformasy qoldanylady. Baǵalaý júıesi ózimizdiń dástúrli qoldanyp júrgen elektrondy kúndelik jýrnaly arqyly júrgiziledi. 30 tamyzdan bastap oqýshylar men muǵalimderge osy platformalar qoljetimdi bolady. Logın men paroldary belgilenip, taratyldy», - dedi ol Ortalyq kommýnıkatsııalar qyzmetindegi baspasóz máslıhatynda.
Onyń atap ótýinshe, elorda oqýshylary arasynda kompıýterge qajettilik boıynsha monıtorıng júrgizilgen. Nátıjesinde 34 472 kompıýter satyp alýǵa shart jasalǵan.
«Birinshi kezekte áleýmettik az qamtylǵan otbasylardyń balalary 100 paıyz qamtylady. Jetim, ata-anasynyń qamqorlyǵynsyz qalǵan balalarǵa jáne bilim berýde erekshe qajettiligi bar balalarǵa kompıýter mindetti túrde beremiz. 20 tamyzdan bastap elordalyq mektepterde oqýshylarǵa kompıýterlik tehnıka, 25-inen bastaý roýterler taratyla bastady. Búgingi tańda 9 myńnan astam kompıýter, 13 300 roýter taratyldy. Bul jumys jalǵasady», - dedi Sholpan Qadyrova.
