Elordalyq oqýshylar arasynda halyqaralyq bilim saıysy ótti
NUR-SULTAN. QazAqparat - «WORLD SCHOLAR'S CUP ASTANA ROUND» atty jasóspirimder arasynda halyqaralyq bilim saıysy ótti, dep habarlaıdy QazAqparat.
Uıymdastyrýshylardyń aıtýynsha, «Bilim Orda» halyqaralyq qoǵamdyq qoryna qarasty «Spectrum» halyqaralyq mektebi bul jarysty bıyl 5-shi ret óz bazasynda ótkizdi. Bıyl oǵan 652 oqýshy qatysty, sonyń ishinde Qazaqstannan bólek birqatar shet elderden, atap aıtqanda Qyrǵyzstan men Serbııadan kelgender bar. Ekikúndik saıys barysynda oqýshylar debat, esse jazý, testileý jáne vıktorınalyq suraqtarǵa jaýap berý sııaqty jarys túrlerine qatysyp, baq synaǵan.
«WORLD SCHOLAR'S CUP» saıysynyń maqsaty - jasóspirimderdiń qabiletterine jol ashý, boıyndaǵy darynyn is júzinde qoldaný arqyly bilim mazmunyn jańartý, jalpy bilim deńgeıin, oı-órisin jáne zııatkerlik deńgeıin arttyrý.
Aıta keterlik mańyzdy jańalyqtyń biri aǵymdaǵy jyly 8-13 shilde aralyǵynda WORLD SCHOLAR'S CUP GLOBAL ROUND kezeńi de Qazaqstanda ótedi. Bul saıys álemniń 5 elinde ótedi. Sonyń biri Qazaqstan bolyp, ol jarysqa álemniń túkpir-túkpirinen 1000-ǵa tarta oqýshy qatysady dep josparlanǵan.
«Byltyr GLOBAL ROUND kezeńine bizdiń oqýshylarymyz Kýala-Lýmpýrǵa barǵan bolatyn. Bıyl óz elimizde ótetin bolady. GLOBAL ROUND kezeńinen ótken oqýshylar AQSh-taǵy Iel ýnıversıtetinde fınalǵa qatysady», - delingen baspasóz baıanynda.
