Elordalyq oqýshy sheteldik birneshe ýnıversıtetke oqýǵa tústi
ASTANA. QazAqparat - Astanadaǵy Daryndy balalarǵa arnalǵan № 9 «Zerde» mektebiniń oqýshysy Germanııa, Qytaı, Kıpr jáne Katardyń JOO-laryna oqýǵa tústi, dep habarlaıdy QazAqparat qala ákimdiginiń saıtyna silteme jasap.
Nuráli Sarbaqysh «Zerde» mektebiniń 11-synyp oqýshysy. 7-synypta osy mektepke test tapsyrý arqyly konkýrstan ótip, qabyldanǵan. Oqýshy qalalyq, respýblıkalyq pándik olımpıadalarda júldeli oryndardan kóringen.
Nuráliniń fızıka salasyna qushtarlyǵy joǵary ekenin osy mekteptiń fızıka pániniń muǵalimi Hatab Qambar baıqaǵan. Ustazy shákirtine fızıka salasynyń san qyryn qarapaıym tilmen túsindire otyryp, oqýshynyń ǵylymǵa degen qushtarlyǵyn, yntasyn oıatqan.
Qazirgi kúnde Nuráli sheteldiń alty joǵary oqý ornyna ótinish berip, tórteýinen «oqýǵa qabyldandyń» degen jaǵymdy jańalyq alyp otyr. Atap aıtar bolsaq ol Germanııanyń - European University of Lefke, Qytaıdyń - University of Science and Technology of Shanghai Jiao Tong, Kıprdiń - Beijing Institute of Technology, Katardyń Carnegie Mellon University JOO-larynyń joldamasyn ıelengen. Endi tek aldynda tańdaý tur. Eń qıyny da sol bolmaq.
«Men qazirgi kezde Fınlıandııa eliniń ýnıversıtetinen, sosyn Nazarbaev Ýnıversıtetiniń jaýabyn kútip otyrmyn. Al AQSh-tyń JOO-syna bergen ótinishim qanaǵattandyrylmady. Oǵan qatty ókinish bildirip otyrǵanym joq. Negizi ózim ishimnen sheshim de qabyldap qoıdym, osy elderdiń ishinen Germanııany tańdap otyrmyn», - dedi Nuráli Sarbaqysh.
