Elordalyq oqýshy: Bolashaǵymdy volonterlikpen baılanystyramyn

NUR-SULTAN. QazAqparat - Elordadaǵy «Zerde» mektebiniń oqýshysy Arýjan Maqsutovanyń volonterlikti janyna serik etkenine eki jyl bolypty. Ol kóńilinen shyqqan volonterlik qyzmetti aldaǵy ýaqytta da atqara bermek, dep habarlaıdy QazAqparat tilshisi.

«2018 jyldan beri volontermin. Volonterlik qyzmet barlyq ýaqytta da unaıtyn. Ol seniń ekinshi otbasyń sııaqty. Múmkin bolashaqta da ómirimdi osy iske arnaıtyn shyǵarmyn. Óıtkeni ózime qatty unaıdy. Sondyqtan jańa sharalarǵa baryp, adamdardy bile túsýge, otbasyma kóp adamdy tarta túsýge tyryspaqpyn. Volonterlik qyzmettiń arqasynda kóptegen jańa adamdarmen tanystym. Volonterlerdiń arqasynda fotografııany jaqsy kóretindigimdi bilip, ózim de fotografqa aınaldym. Buǵan qosa, ýaqytymdy paıdaly iske arnap, adamdarǵa kómek qolyn sozatyndyǵymdy túsinemin», - dedi ol volonterlerdiń «Birgemiz» respýblıkalyq front-keńsesiniń resmı ashylýyna arnalǵan sharada.

Arýjan Maqsutova elordada ótken Dımash Qudaıbergenniń kontsertin, IronMan jarysyn, kóptegen kontsert pen kórmeni uıymdastyrýǵa qatysyp, ysylǵan. Volonterlermen aqsha jınap, balalar úılerine tamaq pen oıynshyqtar jiberýge atsalysqan.

«Sábılerdiń júzindegi shynaıy qýanysh bizdi shabyttandyrady. Árıne, bul sharalardyń bárinen buryn meni Dımashtyń kontserti tań qaldyrdy. Súıip tyńdaıtyn, teledıdardan san márte tamashalaǵan ánshińniń jandy beınesin jaqynnan kórgen sáttegi sezimdi sózben aıtyp jetkizý qıyn. Al sol baqytty sát volonterliktiń arqasynda buıyrdy», - dedi jas volonter.

Volonterlikke qurbysynyń úgitteýimen kelgen Arýjan bul isine esh ókinbeıtindigin aıtady.

«Volenterlikke tosynnan keldim, bul qozǵalysqa qurbym shaqyrǵan edi. Kelisimimdi bergen sátten beri áli bir ret te ókingen emespin», - dedi ol.