Elordalyq oqýshy 100 myń teńgesin joǵaltqan qyzdy izdep tapty
ASTANA. QazAqparat - Elordalyq oqýshy taýyp alǵan aqsha men qujattary bar ámııandy ıesine qaıtaryp berdi, dep habarlaıdy QazAqparat tilshisi.
Astana qalalyq Polıtsııa departamentiniń málimetinshe, №28 orta mekteptiń 11-synyp oqýshysy Ilıa Shavıkov Kenesary kóshesiniń boıynan 112 myń teńgeden astam aqshasy men bank kartalary salynǵan ámııan taýyp alǵan. Oqýshynyń sózine qaraǵanda, ol ata-anasymen birge áleýmettik jeliden Polıtsııa departamentiniń Tabylǵan zattar bıýrosynyń jumysy týraly habarlamany jıi kóredi. Osydan keıin ol taýyp alǵan zatyn ıesine qaıtaryp berý úshin Bıýro kómegine júgingen.
«9 qańtar kúni Astana qalalyq PD Tabylǵan zattar bıýrosynyń qyzmetkerleri tekserý jumystaryn júrgizgennen keıin ámııan ıesin tapty. Ámııanyn joǵaltqan qyz Polıtsııa departamentine shaqyrylyp, sol jerde Ilıa Shavıkov onyń zattaryn qaıtaryp berdi. Ámııan ıesi Ilıaǵa, ata-anasyna shynaıy rızashylyǵyn bildirip, onyń mundaı áreketi tárbıeli azamat ekendigin bildiretindigin aıtty», - delingen taratylǵan aqparatta.
