Elordalyq oftalmologtar kózdiń kórý qabiletin qalpyna keltirýdiń jańa ádisin ıgerdi
ASTANA. QazAqparat - №2 qalalyq aýrýhanada alǵash ret qalalyq statsıonar deńgeıinde joǵary mamandandyrylǵan medıtsınalyq kómek - «vıtrektomııa» ádisi engizildi.
Vıtrektomııa («vıtreým» - latyn tilinen aýdarǵanda shyny tárizdes dene; «ektomııa» - joıý) - ózgeriske ushyraǵan shyny tárizdes deneni joıýǵa arnalǵan operatsııanyń túri. Osy ýaqytqa deıin emi joq dep kelgen kóz tory men shyny tárizdes deneniń aýrýlaryn emdeýge osylaısha múmkindik beredi.
Vıtrektomııa operatsııasy kirpikti deneniń tegis bóliginde, kózdiń syrtqy móldir qabyǵy men toryna úsh kishkentaı tilik jasaý arqyly júzege asady. Osylaısha quraldardy engizý tor qabyǵy men kózburshaqty zaqymdaýdan saqtaıdy.
«Bul zamanýı vıtreoretınaldy hırýgııalyq ádistiń bir ǵana negizgi mindeti - kóz tory men shyny tárizdes deneniń asqynǵan patalogııasynda janardyń kórý qabiletin qalpyna keltirý. Atalmysh ádis aǵymdaǵy aıdan bastap qoldanysqa endi. Osy ýaqytqa deıin úsh naýqasqa ota jasaldy. Olardyń jaǵdaılary jaqsy, úılerine shyǵarylǵan», dep habarlaıdy Astana qalasy Densaýlyq saqtaý basqarmasynyń baspasóz qyzmetinen.
