Elordalyq mobıldi top bir táýlikte 16 karantın buzý jaǵdaıyn tirkedi
«Taýarlar men qyzmetterdiń sapasy men qaýipsizdigin baqylaý basqarmasy, ákimdik qyzmetkerleri, eriktiler men polıtsııa qyzmetkerlerinen quralǵan mobıldi top kún saıyn karantın rejıminiń saqtalýy boıynsha reıdtik sharalar ótkizedi. Astanalyqtar birqatar eskertý sharalary kórsetilgen qaýlyǵa qaramastan, áli de oıyn-saýyq nysandaryna, kompıýterlik klýbtarǵa barýdan, dostar arasynda ýaqyt ótkizýden tartynar emes. Beıqam turǵyndar sanıtarlyq talaptardy elemeı, qala turǵyndaryna qaýip tóndirýde», - dep jazdy departament Instagram jelisinde.
Ótken táýlikte polıtsııa departamentiniń aýmaqtyq bólimsheleri jáne taýarlar men kórsetiletin qyzmetterdiń sapasy men qaýipsizdigin baqylaý basqarmasynyń ókilderi 67 kásipkerlik nysandy tekserip, karantın buzýdyń 16 jaǵdaıyn anyqtady. Keı nysandar kóbirek paıda tabýdy kózdep, kelýshilerdi qupııa esikten kirgizip otyrǵan.
«Salynǵan tyıymǵa qaramastan, keshe saǵat 01: 09-da mobıldi top «Nirvana» kafesin anyqtady, onda júzden astam kelýshi karantındi umytyp, bı keshin jasaǵan. Kafe ákimshiligi negizgi esikti japqandaı bolyp, qonaqtardy qupııa esikten kirgizip otyrǵan. Sondaı-aq, reıd barysynda monıtorıngtik top saǵat 01.15-te sanıtarlyq normalardy buzyp, kelýshilerge qyzmet kórsetken «PeiZdes» laýndj-baryn áshkereledi. Karantın rejımin tek oıyn-saýyq mekemeleri ǵana buzbaıdy. Túngi reıd barysynda mobıldi top tyıym salynǵan ýaqytta jumys istegen loto-klýbtardy, kompıýterlik klýbtar men dúkenderdi anyqtady», - dep habarlady Polıtsııa departamenti.
Karantın rejımin buzǵandar týraly barlyq materıal QR Ákimshilik quqyq buzýshylyq týraly kodeksiniń 425-babymen ákimshilik jaýapqa tartý úshin Taýarlar men qyzmetterdiń sapasy men qaýipsizdigin baqylaý basqarmasyna joldandy.
