Elordalyq meshitterde merekelik namaz ótedi
ASTANA. QazAqparat - Bıyl musylmandardyń qasıetti merekesi Qurban aıt 12 qyrkúıekten bastap toılanady. Bul kúni qalanyń barlyq meshitterinde saǵat 7.30 merekelik namaz oqylady. «Nur Astana», «Áziret Sultan» jáne «S. Ǵylmanı» meshitterinde qaıyrymdylyq aktsııalar, jármeńkeler jáne sporttyq jarystar uıymdastyrylady, dep habarlady elorda qalasy ákiminiń resmı saıty.
«Áljan ana» meshitiniń ımamy Sábıt Qýanyshtyń aıtýynsha, mereke 11 qyrkúıekte - qasıetti Arafa kúninen bastalady, barsha álemniń musylmandary bul kúni qasıetti Mekke qalasynda jınalyp, ǵıbadat etedi.
- Merekeniń ózi qyrkúıektiń 12-sinen 15-ne deıin toılanady. Qazirgi kezde Astanada daıyndyq jumystary júrip jatyr. Namazdan keıin qurbandyq shalýǵa bolady. Maldy 14 qyrkúıekte kún batqansha qurbandyqqa shalady. Merekege oraı sıyr, túıe jáne qoı soıýǵa bolady, - deıdi Sábıt Qýanysh.
Elordada barlyq sanıtarlyq normalardy saqtaı otyryp, mal soıýǵa arnalǵan 8 oryn belgilendi. Astana q. aýyl sharýashylyq basqarmasynyń habarlaýynsha, onyń jeteýi qala aýmaǵynda («Temesh» ShQ, «Shaýshen» ShQ, «Nurbereke 555» JShS, «Jaılaý» bazary, «Maqsat 2007», «Metro» SÚ, «Saıanur» bazary), bireýi Aqmola oblysynda ornalasqan.
- Mal soıatyn oryndarda veterınarlyq baqylaý qamtamasyz etiledi. Qalalyq beketterde maldy ákelý kezinde ІІD men birge kezekshi dárigerler qujattardyń, anyqtamalardyń bolýyn tekseredi. Qujattar bolmasa, olar qalaǵa jiberilmeıdi, - dedi Astana qalasynyń Din isteri jónindegi basqarmanyń monıtorıng jáne taldaý bóliminiń basshysy Arman Pırzadaev.
Aıta keteıik, 12 qyrkúıekte «Nur Astana» meshitinen «Altyn taǵa» bazaryna deıin 1 saǵat aralyqpen saǵat 14.00-ge deıin arnaıy avtobýs qatynaıdy.
Buryn habarlanǵandaı, óńirlerde adamdar men janýarlarǵa juǵatyn asa qaýipti aýrýlar tirkelip otyrǵandyǵyn eskere kele, elorda turǵyndary men qonaqtarynan mal satyp alý kezinde muqııat bolýlaryn suraımyz.
2014 jyldan beri epızootıkalyq jaǵdaıdy saqtaý maqsatynda respýblıkanyń 5 óńirinen - Almaty, Jambyl, Shyǵys Qazaqstan, Ońtústik Qazaqstan, Qyzylorda oblystarynan. mal men et ákelýge tyıym salyndy.
Maldardy tek atalǵan meken jaılar boıynsha ǵana satyp alyńyzdar. Satyp alý kezinde satýshydan malǵa jasalǵan vaktsınalar týraly tıisti belgiler qoıylǵan veterınarııalyq anyqtamany kórsetýin surańyz.
Ekpe jasalǵan kúnge basa nazar aýdaryńyz. Ekpe jasalǵannan keıin mal kem degende 15 kún karantınde bolady. Osylaısha, sońǵy ekpe 15 kún buryn jasalýy tıis.
Zańnama normalaryna sáıkes, ishki saýda obektilerine, sonyń ishinde bazarlarǵa satý úshin túsken janýarlardan alynatyn ónimder ony tamaqqa paıdalanýdyń qaýipsiz ekendigin kórsetetin ilespe veterınarııalyq qujattar bolmasa, tárkilenip, joıylady.
