Elordalyq mekteptiń birine bomba qoıylǵandyǵy týraly anonımdi qońyraý rastalǵan joq - TJM
ASTANA. 16 jeltoqsan. QazAqparat - Elordalyq mekteptiń birine bomba qoıylǵandyǵy týraly anonımdi qońyraý rastalǵan joq,
dep habarlady Tótenshe jaǵdaılar mınıstrliginiń baspasóz qyzmetinen.
Keshe Astana qalasy Tótenshe jaǵdaılar departamentiniń kezekshilik pýltine belgisiz bireý qońyraý shalyp, ál-Farabı yqshamaýdanyndaǵy №38 orta mekteptiń ǵımaratyna jarylǵysh zattyń qoıylǵany týraly habarlady.
«Júrgizilgen arnaıy is-sharalardyń barysynda eshqandaı jarylǵysh qurylǵy tabylǵan joq. 570 adam qaýipsiz jerge kóshirildi, olardyń 520-sy - balalar. Qurban bolǵandar men zardap shekkender joq»,- delingen vedomstvonyń aqparatynda.
Tótenshe oqıǵany joıýǵa jedel áreket etý qyzmetiniń 30 adamy men 7 tehnıkasy jumyldyryldy.
