Elordalyq mektepte «Ózin-ózi taný» pániniń erekshelikteri talqylandy
ASTANA. 1 qarasha. QazAqparat - Elordada ıÝ.Gýrov atyndaǵy №6 gımnazııada «Ózin-ózi taný» pánin oqytýdyń ádistemelik erekshelikteri men onyń balalarǵa áserin talqylaý maqsatynda 70 astam oqytýshy bas qosty. Bul týraly Balalardyń quqyǵyn qorǵaý basqarmasyna silteme jasap astana.kz habarlady.
Vedomstvonyń habarlaýynsha, rýhanı-adamgershilik bilim berý baǵdarlamasy aıasynda qazan aıynan keler jyldyń sáýir aıyna deıin bala baqshalarda, mektepterde, kolledjderde jáne joǵary oqý oryndarynda «Ózin-ózi taný» páninen ashyq sabaqtar ótkiziledi. Búgingi tańda elordada atalǵan pán boıynsha 1 synypta «Jaqsy kórýdi úırenemiz», 5 synypta «Adamdar qatynastarynyń álemi» jáne 6 synypta ádebıet pen ózin-ózi taný páni boıynsha «Baqyt» birikken sabaǵy uıymdastyryldy.
Astanada №6 gımnazııada «Oqýshylardyń ózin-ózi taný sabaqtaryndaǵy toptyq qyzmeti kommýnıkatıvtik mashyqtardy damytý quraly retinde» taqyrybynda ótken praktıkalyq semınarda ashyq sabaqtardyń qorytyndysy shyǵaryldy.
«Semınar barysynda qatysýshylar sabaqtardyń joǵary deńgeıde ótkizilgenin jáne sapaly daıyndalǵanyn atap ótti. «Ózin-ózi taný» sabaǵynda oqýshylar toppen jumys isteı biletinderin, bir-birin tyńdaıtyndaryn, máselelerdi talqylap, sheshimder taba alatyndaryn kórsetti»,- delingen habarlamada.
