Elordalyq qutqarýshylar bir túnde 160 adamǵa kómek kórsetti
NUR-SULTAN. QazAqparat – Nur-Sultan qalasynyń ákimdigi shahardan shyǵatyn avtojoldardyń barlyq baǵyty boıynsha kólik qozǵalysy ashylǵanyn málim etti, dep habarlaıdy QazAqparat tilshisi.
Bul týraly Nur-Sultan qalasy ákimdiginiń resmı saıty jazdy.
«30 naýryz kúni tańǵy saǵat 8.00-den bastap aýa raıynyń turaqtalýyna baılanysty Nur-Sultan qalasynan avtojoldardyń barlyq baǵyty boıynsha kólik qozǵalysy ashyldy. Bul týraly qala ákimdiginiń resmı saıty qalalyq Tótenshe jaǵdaılar departamentine silteme jasap habarlaıdy.
Ótken túnde aýa raıynyń nasharlaýyna baılanysty (boran, ekpindi jel, nashar kóriný, kóktaıǵaq) elordalyq qutqarýshylar kúsheıtilgen rejımde jumys istep, 35 ret shaqyrtýǵa shyqty. Onda qala jáne qalanyń jaqyn mańyndaǵy ýchaskelerde avarııalyq-qutqarý operatsııalaryn júrgizý kezinde 160 adam, onyń ishinde 52 bala qutqaryldy», - dep jazylǵan resmı málimette.
Al qala aıaldamalarynda avtobýs kútip qalǵan azamattardy jetkizý úshin 25 jergilikti vahtashy jumys istegen.
«Blok-beketterde halyqtyń qaýipsizdigin qamtamasyz etý maqsatynda TJD qyzmetkerleri polıtsııa departamentimen birlesip tıisti túsindirý jumystaryn júrgizildi.
«112» jelisine 2175 qońyraý kelip tústi. Sondaı-aq 29 naýryz kúni saǵat 18:20-dan bastap 30 naýryz saǵat 6.00 aralyǵynda qatty jel, boran saldarynan bolǵan jaǵdaılar boıynsha 18 habarlama tirkeldi. Onyń ishinde aǵashtyń qulaýy, shamdardyń synýy, shatyrdyń búlinýisııaqty aqaýlar bolǵan. Barlyq aqaýlar menshik ıeleriniń kúshimen joıylady. Qatty jeldiń saldarynan qalalyq aýrýhanalarǵa 3 adam júgingen, onyń ishinde bir bala bar», - delingen TJD habarlamasynda», - dep jazady ákimdik saıty.
Resmı aqparat boıynsha, avarııalyq-qutqarý jumystaryna departamenttiń jeke quramynan 40 adam men 15 tehnıka jumyldyrylǵan.
«Elorda turǵyndary men qonaqtaryna aýa raıynyń ózgerýin jáne engizilgen shekteýlerdi qadaǵalap, daýyldy eskertý jarııalanǵan jaǵdaıda qaladan tys jerlerge barýdan bas tartyp, qyraǵy bolýǵa keńes beremiz.
Jel kúsheıgen jaǵdaıda eshqaıda shyqpaýdy keńes etemiz. Balalaryńyzǵa abaı bolyńyz, olardy qaraýsyz qaldyrýǵa bolmaıdy. Eger qatty jel kezinde kóshede bolsańyz jerasty ótkelderine nemese ǵımarattardyń kireberisine jasyrynǵanyńyz jón. Qatty jelden úılerdiń qabyrǵalaryna jaqyn jasyrynbańyz, óıtkeni shatyrlardan shıfer men ózge de zattar qulaýy múmkin.
Tótenshe jaǵdaı týyndaǵanda «112» telefonyna qońyraý shalyńyz», - dep habarlaıdy qalalyq TJD», - dep jazylǵan málimette.
«Qazgıdromettiń» búgingi málimeti boıynsha elimizdiń Shymkent qalasynan basqa óńirlerinde daýyldy eskertý jarııalandy. https://kaz.inform.kz/news/kazakstannyn-shymkentten-baska-barlyk-onirinde-dauyldy-eskertu-zhariyalandy_a3916882
