Elordalyq qutqarýshylar: Adamdar ómirin baǵalamaıdy
ASTANA. QazAqparat - Astana qalalyq tótenshe jaǵdaılar departamenti elorda turǵyndaryn qysqy ýaqytta tas jolda shyqqanda barynsha abaı bolýǵa shaqyrdy, dep habarlaıdy QazAqparat.
Búgin BAQ ókilderine arnaıy uıymdastyrylǵan baspasóz máslıhaty barysynda Astana qalalyq TJD Tótenshe jaǵdaılardy joıý bóliminiń bastyǵy Eldor Raıymbekov ótken jyly oryn alǵan oqıǵalardyń birin aıtyp berdi.
«Ótken jyldyń aqpan aıynda Qabanbaı batyr aýylyna qutqarý jumysyn júrgizý úshin attandyq. Abyroı bolǵanda adamdar uıaly baılanys ustaıtyn jerde boldy. Áıtpese, telefonsyz olar úsip óler edi. Kólikte emshektegi bala, kishkentaı balalar da bar. Sol kezde adamdardyń óz ómirlerine nemquraıly qaraıtyndyǵyn túsindim», - dedi ol.
Onyń aıtýynsha, qar qursaýynda qalǵan adamdardy qutqarý úshin elordadan jol talǵamaıtyn eki kólik shyqqan.
«Jolda bir kóligimiz shuńqyrǵa túsip ketip, ony shyǵaryp alǵannan keıin sol jerde tastap ketýimizge týra keldi. Sebebi árbir sekýndymyz qymbat edi», - dep eske alady E.Raıymbekov.
Astana qalalyq tótenshe jaǵdaılar departamenti bastyǵynyń orynbasary, azamattyq qorǵaý polkovnıgi Meırambek Qaısanovtyń aıtýynsha, qys mezgilinde tirshilikti qamtamasyz etý nysandarynyń jaı-kúıi men qaýipsizdigin qamtamasyz etý turaqty baqylaýda. Qutqarýshylar «Kóktem-2017», «Jer-2017», «Qońys-2017», «Qys-2017» respýblıkalyq shtabtyq oqý-jattyǵýlaryna qatysqan.
Jalpy ótken jyly Aqmola oblysyna qarasty eldi mekenderde 108 adam qar qursaýynan qutqarylǵan. Abyroı bolǵanda adam shyǵyny joq. Bıyl da tótenshe jaǵdaılar qyzmeti jeke quramynyń 670 mamany men 430-dan astam tehnıkasy kez kelgen oqys jaǵdaıda kómek kórsetýge daıyn.
