Elordalyq kópbalaly ana qos birdeı baspanaǵa ıe boldy
NUR-SULTAN. QazAqparat – «Qazaqstan» arnasyndaǵy «Niet» baǵdarlamasynda kópbalaly anaǵa eki baspana syıǵa tartyldy, dep habarlaıdy QazAqparat telearnanyń baspasóz qyzmetine silteme jasap.
Bes balaly jalǵyzbasty ana, ekinshi toptaǵy múgedek Zúlfııa Jumabaeva baǵdarlamaǵa kómek surap habarlasqan. Onyń panalaıtyn turaqty baspanasy bolmaǵan.
«Osyǵan deıin demeýshilerdiń, qaıyrymdy jandardyń kómegimen kún kórip jatyrmyz. Balalardyń kúndelikti qajettiligin zeınetaqyǵa alamyn. Muqtajdyǵymyz – tek baspana», - degen kópbalaly anaǵa tikeleı efırde Astana mańyndaǵy Qoıandy aýylynyń turǵyny habarlasyp, eki bólmeli páter syılaıtynyn aıtty. Bul baǵdarlama ujymy úshin de, kómek surap kelgen kópbalaly ana úshin de kútpegen jaǵdaı boldy. Odan bólek, «Qareket» qaıyrymdylyq qorynyń ókilderi úsh bólmeli baspananyń kiltin tabystady», - delingen baspasóz qyzmetiniń habarlamasynda.
Sonymen birge, eki saǵat tikeleı efırde júretin baǵdarlamaǵa 80-ge jýyq adam qońyraý shalyp, Zúlfııa Jumabaevaǵa qarjylaı kómek usyndy. Efır barysynda kópbalaly ananyń densaýlyǵyna medıtsınalyq tekseris qajet ekeni aıtylǵan. Bul máseleni «Niet» jobasynyń sarapshylar quramyndaǵy mamandar nazarǵa almaq.
Aıta keteıik, kúzgi telemaýsymda «Qazaqstan» Ulttyq arnasy áleýmettik baǵyttaǵy «Niet» baǵdarlamasyn kórermen nazaryna usyndy. Tikeleı efırde ótetin árbir habar belgili bir adamnyń, otbasynyń máselesine arnalyp, arnaıy sarapshylardyń aqyl-keńesimen sheshimin tabady.
