Elordalyq kompanııa aqyly kólik turaqtary úshin tólemderdi zańsyz jınaǵan - ákimdik
NUR-SULTAN. QazAqparat - Nur-Sultan qalasynyń ákimdigi kelisimshart mindettemelerin oryndamaǵany jáne talaptardy elemegeni úshin «Parkovochnoe prostranstvo» JShS-men kelisimshartty buzý týraly sotqa aryz berdi, dep habarlaıdy QazAqparat tilshisi.
«Zańdy negizi joq kásiporyn (Nurjol býlvaryn qospaǵanda) qalanyń jol jelisi boıyna parkomattar, jol belgileri men aqparattyq taqtalar ornatqan. Jabdyqty demontajdaý qajettiligi týraly «Parkovochnoe prostranstvo» JShS-na birneshe ret eskertilgenimen ótinish elenbedi. Sonymen qatar tekserý kezinde komıssııa qoǵamdyq kólik turaqtary úshin tólemderdiń zańsyz jınalǵanyn anyqtady«, - delingen ákimdiktiń Facebook -tegi resmı paraqshasynda jarııalanǵan aqparatta.
Osyǵan baı̆lanysty Nur-Sultan qalasy ákimdiginiń Kólik jáne jol-kólik ınfraqurylymyn damytý basqarmasy avtokólik ıeleri shyǵyndaryn óteý maqsatynda Memlekettik kirister departamentine hat joldaǵan.
Eske sala keteı̆ik, kósheler men dańǵyldardy keptelisten aryltýǵa arnalǵan ilki joba 2018 jyldyń 15 qańtarynda Nurjol býlvarynyń aýmaǵynda bastaldy. Joba jeke seriktestik qarjysyna júzege asyryldy. Bolashaqta parkomattardyń sanyn keńeı̆tý josparlanǵan. Alaıda «Parkovochnoe prostranstvo» JShS tarapynan birneshe ret zańbuzýshylyq oryn alýyna jáne turǵyndardyń shaǵymdaryna baı̆lanysty elorda ákimdigi jobanyń keńeıýin toqtata turý sheshimin qabyldady. Kelisimshartty buzý týraly sotqa aryz berildi.
