Elordalyq kóliktegi ІІD eki qyzmetkeri alaıaqtyq úshin ustaldy
ASTANA. KAZINFORM - Sybaılas jemqorlyqqa qarsy is-qımyl ulttyq bıýrosynyń Astana q. boıynsha departamenti kóliktegi ІІD qyzmetkeri A. Bekmoldınovke kóliktegi ІІD burynǵy qyzmetkeri E. Qarlyǵashevqa jáne ózge de tulǵalarǵa qatysty alaıaqtyq jáne zańsyz bostandyqtan aıyrý faktileri boıynsha qylmystyq is qozǵady, dep habarlady Sybaılas jemqorlyqqa qarsy is-qımyl ulttyq bıýrosynyń baspasóz qyzmetinen.
Іshki ister organdarynyń qyzmetkeri azaptaý úshin buryn sottalǵan burynǵy qyzmetkermen kelisip, esirtki zatyn saqtaǵany úshin úsh azamatty ustap, jalǵa alynǵan páterde zańsyz 2 táýlik boıy ustaǵan.
Ári qaraı ustalǵandardyń biriniń týystarynan bulardy qylmystyq jaýapkershilikke tartpaý úshin 2 mln teńge men júk kóligin qaıta rásimdeýdi talap etken.
Qazir A. Bekmoldınov jáne E. Qarlyǵashev qamaýǵa alyndy.
Ózge sybaılastaryn ustaý boıynsha tıisti sharalar qabyldandy.
Sot aldyndaǵy tergeý júrgizilip jatyr.
