Elordalyq QHA sý tasqynynan zardap shekkenderge kómek kórsetti
Bıyl Aqmola oblysynyń Atbasar, Sandyqtaý, Astrahan aýdandaryndaǵy keıbir eldi mekenderdi sý basyp, turǵyndar qıyn jaǵdaıdy bastan keshirýde.
Jalpy, Astrahan aýdanynda 112 úı sý astynda qalǵan. 280 adam qaýipsiz jerge kóshirilgen, onyń ishinde 89 bala bar. Osyndaı qıyn jaǵdaıǵa qalǵan aǵaıyndarǵa «Nur Otan» partııasy Astana qalalyq fılıaly men Astana qalasynyń Qazaqstan halqy Assambleıasy Aqmola oblysynyń Qyzyljar, Novyı Kolýton eldi mekenderine gýmanıtarlyq kómek jasady.
«Qaıyrymdylyq - halqymyzdyń eń izgi qasıetteriniń biri. «Janashyrlyqqa - jan rıza» degendeı sý tasqynynan zardap shekkenderge qamqorlyq jasaý, aıaly alaqanyn tosyp, júrek jylýyn usyný, saýaby mol iske atsalysý, árbir adamnyń azamattyq paryzy emes pe? Mine endi bizdiń qalalyq nurotandyqtar Aqmola oblysyna attanyp barady», - dedi «Nur Otan» partııasy Astana qalalyq fılıaly tóraǵasynyń birinshi orynbasary Edil Mamytbekov elordadan Aqmola oblysyna gýmanıtarlyq júk kerýenin shyǵaryp salý saltanatynda.
«Nur Otan» partııasy Astana qalalyq fılıalynyń bul gýmanıtarlyq bastamasyna elordalyq Qazaqstan halqy Assambleıasynyń ókilderi óz úlesterin qosty. Jalpy quny 8 mıllıon bolatyn turmysqa qajetti zattardyń ishinde kıim-keshek, tósek-oryndar, aıaq kıim jáne un, makaron, qant, kúrish sııaqty azyq-túlik bar. Osynshama gýmanıtarlyq kómek jasaýda «BIG Shanhaı» bazarynyń basshysy, Astana qalalyq máslıhatynyń depýtaty Qaıyrly Táýkenniń qosqan úlesin erekshe atap ótken jón. Ol bazarda saýda jasaıtyn 5 myńǵa jýyq arendator- saýdagerlerge «Jaqanyńa járdemdes» aktsııasy negizinde úndeý tastady. Sonyń negizinde bazarda jumys isteıtin 12 ulttyń ókili sý tasqynynan qıyndyq kórgen halyqtyń jaǵdaıyna túsinistikpen qarap, óz kómekterin aıamaı zattaı da, aqshalaı da berdi.
Gýmantıarlyq júk kóligi aldymen Astrahan aýdanynyń Novyı Kolýton eldi mekenine keldi. Munda 17 úıdi sý basqan. Jurtshylyqtyń kóńili jabyrqaýly bolǵanymen, azyq túlik tıelgen júk kóligin kórgen kóńilderi birshama kóterildi.
«Qurmetti aǵaıyndar, baýyrlar, biz nurotandyqtar sizderdiń qıyn jaǵdaıǵa qalǵandaryńyzdy estip, qol qýsyryp qarap otyra almadyq. Astanadan arnaıy kómek qolyn sozýǵa keldik. Ómirdegi eń ıgi isterdiń biri - muqtaj jandarǵa qamqorlyq jasaý. Adamdar bir - birine qaıyrymdylyq, meıirimdilik tanytý arqyly jaqsylyq jasaıdy emes pe. Sondyqtan búgingi ákelip otyrǵan kıim-keshek pen azyq-túlikter elordadaǵy baýyrlaryńyzdyń jomart júrekten shyqqan izgilik nıeti,- dedi máslıhat depýtaty Qaıyrly Táýken.
Budan keıin Astana qalasy Qazaqstan halqy Assambleıasy hatshylyǵynyń meńgerýshisi Lázzat Qusaıynova da sóz sóılep, jınalǵan jurtshylyqty shydamdylyqqa shaqyryp, óziniń jyly lebizin bildirdi.
Munan keıin keıin nurotandyqtar Qyzyljar eldi mekenine keldi. Munda 800-ge jýyq halyq turady. 28 úı sý astynda qalypty. Adamdar aman, qoradaǵy maldary da shyǵynsyz. Jetkizilgen azyq-túlik pen kıim- keshekter jurtshylyqqa túgeldeı úlestirildi.
