Elordalyq QHA «Qamqor» qaıyrymdylyq aktsııasyn bastady

NUR-SULTAN. QazAqparat – Elordalyq Assambleıa etnomádenı birlestikter quramyndaǵy kásipkerlermen birlesip, «Qamqor» qaıyrymdylyq aktsııasyn uıymdastyrdy. Bul týraly astana ákimdigi QHA-nyń baspasóz qyzmetine silteme jasap málim etti, dep habarlaıdy QazAqparat.

Atalǵan aktsııa QR Qarýly Kúshteriniń 30 jyldyǵyna jáne Uly Jeńistiń 77 jyldyǵyna oraılastyrylǵan. Aktsııa aıasynda 60 otbasyǵa azyq-túlik sebeti tapsyryldy.

«Biz sizderden dostyqty, patrıotızmdi, Otanǵa degen súıispenshilikti úırenemiz, batyldyqtaryńyzǵa bas ıemiz. Sizderdiń erlikterińizdi qashanda maqtan tutamyz!» - dedi «Vaınah» sheshen-ıngýsh etnomádenı birlestiginiń tóraǵasy Bashır Solsanov.

Kómek alǵan otbasylar uıymdastyrýshylar men demeýshilerge alǵystaryn bildirip, densaýlyq, amandyq jáne isterine tabys tiledi.

Qaıyrymdylyq pen meıirimdilik, ózara qurmet – Qazaqstan halqy Assambleıasynyń basty ustanymy. Dostyq úıindegi «Parasat» qaıyrymdylyq qyzmetin úılestirý ortalyǵy etnomádenı birlestikterdiń kásipkerlerimen birlese otyryp, muqtaj jandarǵa qajetti kómek kórsetý baǵytynda turaqty jumys jasap keledi.

Aıta keteıik, ótken jyly «Qaıyrymdy ister marafony», «30 qaıyrymdy is» aktsııalary aıasynda 55 aktsııa ótkizildi, 5 800 adam jalpy somasy 36 mln teńgege kómek aldy. Bıyl jyl basynan beri 11 qaıyrymdylyq aktsııasy ótkizilip, 3000 otbasyǵa jalpy somasy 11 mln 200 myń teńgege kómek kórsetildi. Buǵan deıin elordalyq Assambleıa eriktileri «Jyly júrek, izgi tilekter!» uranymen naýqas balalardyń emine qarjylaı kómek kórsetken.