Elordalyq kásipker maska tigý kásibin qalaı bastady
NUR-SULTAN. QazAqparat - Koronavırýs ınfektsııasyna baılanysty tótenshe jaǵdaı jarııalanǵan soń, elordalyq kásipkerler jańa baǵytqa beıimdelip jatyr, dep habarlaıdy QazAqparat tilshisi.
Qala ákimdiginiń qoldaýymen, aksessýarlar shyǵaratyn astanalyq «SKINWOOD» JShS kompanııasy eń kóp suranysqa ıe bolǵan qorǵanys maskalaryn óndirýdi qolǵa aldy.
«Muny azamattyq pozıtsııa deýge de bolady. Tótenshe jaǵdaı saldarynan kóptegen kásiporyn jabylyp, adamdar tabyssyz qalyp jatqanda, jańa beıin, jańa baǵyt tańdaýǵa májbúr boldyq. Komandamyz tez arada sheshim qabyldap, maska shyǵarýdy uıǵardyq. Qala ákimdigi de usynymyzdy qoldap, arnaıy qonaqúıge jaıǵastyrdy», - dedi kompanııa basshysy Ádilhan Ahmetov tilshilerge bergen suhbatynda.
Osylaısha, kompanııa naryqqa qajetti taýar shyǵarý, COVID-19 taralýynyń aldyn alý, ımporttyń ornyn basý, halyqty jumyspen qamtý syndy birneshe mańyzdy máselelerdi sheshýge kómektesip otyr.
«Sáýir aıynyń basynda maska shyǵarý bastamasyn usyndyq ta, 5 kúnde kásibı tiginshilerden, tehnolog, ınjenerlerden komanda jasaqtadyq. Olardyń arasynda medıtsına mamandary da bar. Sebebi, karantınde barlyq sanıtarlyq normalardy saqtaý úshin medıtsına mamanynyń bolýy mindetti. Olar tutas óndiristiń, taýarlardyń zararsyzdandyrylǵan bolýyna, qyzmetkerlerdiń aýrý juqtyrmaýyna jaýapty. Kún saıyn dene qyzýyn ólshep, sanıtarlyq-epıdemııalyq normalardyń saqtalýyn, antıseptıkalyq quraldardyń bolýyn qadaǵalaıdy», - dedi Á. Ahmetov.
Qazirgi ýaqytta kompanııada 340 adam jumys isteıdi. Olar arnaıy oqýdan ótken jáne farmatsevtıkalyq medıtsınalyq maska óndirýge lıtsenzııa alǵan.
«ıAǵnı, bizdiń spanbond - meltblaýn - spanbond materıalynan tigilgen úsh qabatty maskalarymyz barlyq talaptarǵa saı keledi. Shıkizatqa kelsek, bul bizdiń elimizde ǵana emes, álem elderiniń basty máselesine aınaldy. Bizdiń kompanııa seriktesteri arqyly belgili bir kólemde shıkizat aldyrdy. Ázirge, táýligine 100 myń, bir aıda - 3 mln maskaǵa deıin shyǵarýǵa múmkindik beretin shıkizat bar. Qazirgi ýaqytta 300 myń maska daıyn jáne ony jergilikti dárihanalarǵa jóneltýge daıynbyz. Jalpy maskanyń baǵasyn farmatsevtıkalyq odaqtar men ákimdik 118 teńge dep bekitken. Biz de sol baǵany ustanýǵa mindettimiz», - dedi ol.
Kompanııa Nur-Sultan qalasynyń ákimdigimen birlesip, karantınde óńirdiń medıtsınalyq maskaǵa suranysyn qanaǵattandyrý jáne baǵany bir deńgeıde ustap turý boıynsha memorandým bekitken.
«Pandemııadan keıin de suranys birden azaımaı, osy kólemde qalady dep oılaımyn. Árıne, qandaı táýekelge baryp otyrǵanymyzdy da túsinemiz. Eń bastysy, tótenshe jaǵdaı bitken soń, naryqty zerttep, sheshim qabyldaıtyn bolamyz», - dedi Ádilhan Ahmetov.
