Elordalyq ınspektsııa kóppáterli úı lıftindegi olqylyq sebebin anyqtaıdy
«Turǵyn úı ınspektsııasynyń málimetinshe, turǵyn úı keshenine qyzmet kórsetetin kompanııa jasalǵan eskertýlerge qaramastan úı lıftterin esepke qoıý boıynsha tıisti jumysty júrgizbegen», - dep atap ótti medıa ortalyqtan.
Aıta keterligi, 31 jeltoqsan kúni Táýelsizdik kóshesi 38/2 úıdiń birinshi kireberisindegi ishinde 8 adam bar lıftide keleńsiz jaǵdaı boldy. Turǵyn úı ıspektsııasynyń málimetinshe, oqıǵa ornyna turǵyn úı basqarmasynyń basshylyǵy kelip, zardap shegýshilermen jáne lıftiniń qulaý sebebin anyqtaýmen aınalysatyn múddeli organdardyń ókilderimen kezdesti.
Qazirgi ýaqytta lıft jabdyǵyn tyńǵylyqty tehnıkalyq saraptaý jumystary júrgizilýde. Qulaǵan «GLIFT» markaly lıfti 2013 jyly Túrkııada shyǵarylǵan jáne oǵan «Begenov» JK servıstik lıfti kompanııasy qyzmet kórsetken. Bul turǵyn úıdiń basqarýshy organy «Toqabaev» JK jáne ol atalǵan servıstik kompanııamen kelisimshart jasasqan.
«Astana qalalyq turǵyn úı ınspektsııasy basqarmasy óz kezeginde 2017 jyldyń mamyrynda «Toqabaev» JK-ge qaýipti tehnıkalyq qurylǵylardy (lıftilerdi) paıdalaný barysyndaǵy óndiristik qaýipsizdik normalaryn saqtaý týraly eskertpeni tabys etken. Al «Toqabaev» JK «Azamattyq qorǵanys týraly» QR zańyna sáıkes turǵyn úı ınspektsııasyna lıftilerdi esepke qoıý týraly jumystardy júrgizbegen», - dep atap ótti vedomstvodan.
Este bolsa, 2017 jyl boıy qala ákiminiń tapsyrmasymen elordada turǵyn úı ıspektsııasy 500-den astam lıftige tekserý júrgizip, nátıjesinde 25 PIK pen lıfti kompanııalaryna qatysty ákimshilik yqpal etý sharasy qabyldanǵan bolatyn.
«Táýelsizdik kóshesindegi 38/2 turǵyn úıiniń lıftisine tekserý júrgizilgen joq. Sebebi turǵyndar tarabynan turǵyn úı ınspektsııasyna ótinish túspedi. Sonymen qatar 2017 jyly jergilikti atqarýshy organdar tarabynan Astanada 96 lıftini aýystyrý jumystary júrgizildi, onyń ishinde 23 lıfti apatty jaǵdaıda boldy», - dedi qalalyq turǵyn úı ınspektsııasynan.
